Süngo/pika ajemba agi alakertemi joko süngo mejaktettsü

Mumbai, February 28 (Agencies): Germany tesem kar nungbo nisungtemi temang tashi aittsü atema süngo temesüng tou (white tea leaves) mejaker.
Süngo/pika/ ya asenok atema kanga tongtibang tajemtsü ka lir, aser iba ya joko kanga sapua mejakteper, iba dak alia iba süngo mejakba ajanga moko mesepertem nicotine ajanga timtem agütsüba ajema kümdaktsür ta bushitetogo.
Germany nungeri white tea leaves mejaker aser iba ya India nung ‘paan masala’ mejakba den mesüktepa lir, ta Ooty nung aliba Doddabetta Tea Factory & Tea Museum’s General Manager, L Varadaraj-i ashi.
Doddabetta Tea Factory nungi Europe linüktemi White Tea yoker aser iba factory GM, Varadadraj-i, “Refreshment atema yangji (Germany) alirtemi White Tea (silver tips tea) mejaker aser iba ya paan masala achiba medem lir ta meteta jangratemer,” ta ashi.
Süngo industry nung White Tea ya jenjang tasakba lir. Item tou ya teka agi petzüker aser anü nung akongba sülen tanga linüktem dangi yoker.
Tanga ama masü saka white leaves yabo processed masür, iba yongji antioxidants aika alir aser temang tajangzük atema green tea dang nungi tajungba, ta pai ashi.
White tea ya tou ajanga masü saka tepen ajanga yanglur. “Iba ya achirtemi tebang nung inoker mejaker. Iba ya ajanga moko mesepertem rongnung nicotine miim ajema kümdaktsür,” ta paisa ashi.