Süngratsü Lanu Zünga Telongjem Dimapur-i sobaliba shisatokden sentong ka ayonga kaogo

Dimapur, November 23 (TYO) : Tanü November 23 nü Süngratsü Lanu Zünga Telongjem Dimapur-i ayongzüka sobaliba shisatokden sentong ka IMC Hall, Dimapur nung liogo.
Iba sentong nung jembidang, Taka Longchar-i Chungliyimti nungi Süngratsü lima tashi lia aruba otsü lanurtem dang lemsatep. Iba den kulemi ano pai pututsung aser putu inyakyim, yimya koda benshia aru ibajia dena rateta lanurtem dang metetdaktsü.
Nokenwapang Ozüküm-i arju yangluba yimya aser arju nung züngaren mapa inyakyim, jembishinü aser arju tesashi ozüngtem lokti den lemsatep.
Imotemjen Longchar-i Süngratsü nungeri keyi asaba yimya, süngkong achiba yimya aser tsürabor mapang nungi asen yimeri tzüyok yimya koda amshia aru, ibajia lanurtemdang metetdaktsü.
Anempong onük nung jembidang, S Taka Imchen-i ashi jembiba, inyakba aser taküm libaliro ajak nung asüngteta aser anemponga alibaji lir. Yamaji asenoki inyakba kechisarena ajak nung anempong shitak benshira asen taküm arishi temoatsü nung jangratema alitsü, ta pai metetdaktsü.
Ano Oboula nunger mapang nungi benshia aruba yimya awashi tajung kaji ‘ jaya jako’ ya lir. Anungji kechi oshi agi jatepdir jatepaka tim jaya jako ya shitak jateptsüla, ta pai sa shisem. Tim jaya jako ya sobaliba shilem nung kanga tongtipang asünung asenok ajaki temulung agüja benshitsüla ta metetdaktsü.
Kasa sentong nung Dimapur Süngratsü Senso Telongjem, Tir, Wb. Rongsenlemba-i jembi liasü. Wb. S Wati Aier-i sarasadema iba sentong tenzük aser tatem nung Wb. Yapangnungsang Jamiri sarasadema sentong tembang