Sungratsü Students’ Union-i Moatsu Carnival ayongzüker

Dimapur, April 27 (TYO) : Moatsü benjung tali mera taketba nung amungtsü atema Sungratsü Students’ Union (SSU)-i May 2, 2016 nü Moatsü Carnival ka ayongzüktsü.
Iba benjung ya Sungratsu Sports Complex, Yimchalu nung nikongtsütsü 1:00 ako nungi tenzüktsü.
Sungratsu yimtsüng nung Moatsü indang sentong tongtiba agitsü aser iba sentong nung Chief Minister, TR Zeliang tongti tesemdanger asütsü. Iba sentong tembangba sülen Sungratsü sports complex, Yimchalu nung Moatsu Carnival tenzüktsü aser tarurtem dang sen 50 entry free agitsü.
Iba benjung nung tongtipang shilem kaji movie theatre nung tawa sayaba “Jungle Book and Superman Vs Batman – Dawn of Justice” film tem sayutsü.
Iba sülen nikongtsütsü kenten sentong ka alitsü aser iba nung Tsüza & Friends, Highland Oracle(Dimapur) aser The School of Music nungi tanurtem dena telok balalai shilem agitsü.
Moatsü Carnival nungsa stall balala lapoktsü aser item nung osettsüset balala angutsü. Ano chiyungtsü stall tem nung Sungratsu anishi den chiyungtsü tapu balala angutsü.
Iba benjungmung nung Mokokchung jila nung alirtem aser raliwalirtem ajak arua adentsü pelashishia jaoker, ta Moatsu Carnival, 2016 Organizing Committee Convener, Adang Jamir-i sangdong ka nung metetdaktsü.