Süngyanglu jenjang – T. Ken 135:13-21

Laishiba nung mapa kar kanga tongtipang Tsüngremi lepshia amshiba angur. T.ken 135 tatembanglen tekongtem aser T.ken 115 nung tangar kintem süngyanglu tasü süngyanglu ta ashiba angur. “Kintem süngyanglutemji nisung teka agi yangluba mapa hon aser taribi lir. Parnok tebang lir, saka parnoki mejembir; parnok tenük lir, saka parnoki mangur; parnok tenarong lir, saka parnoki mangashir; mesüra parnok tebang nung tangula kecha mali. Nisung shia shibai parnok dak temulung lemdir, shirnoki parnok yanglu parnok mesüka akümtsü” (t. 15-18). Yangi asenoki tamachi külembaji nisung teka mapa lir. Saka tanü ibaji inyaker. Aikati parnok teka mapa külemer.
Nai külemdar ta nai koda metet? Nai inyakba mapa, tenla aser kechi alir aji ne Tsüngrem. Kari sen külemer. Kar asoshi rongsentem. Ano kari nükjitong mesüra nübur. Iba tamashi ken züluri asenok dang ashir. Süngyanglutem tebang lir, saka parnoki tenangzükba meyanglur. Saka asen Tsüngremi asenok den jembir, aser Pai pa o nung tenangzükbatem agütsür. Süngyanglutem tenük kar, saka parnoki angutsü makok. Parnoki mawabangteter.
Tsüngrem tenüki asenok anogo shia mapang ajak nung mita alir. Pa kodanga memejanger. “Kibuba tenük Temeshi pur madak teti alir” (T.ken 34:14). Pai pa chirtem anebalur. Süngyanglutem tenarong kar, saka parnoki ne sarasademtem mangashir. Nai süngyanglu ka den jembira, nai ne sasa den jembir. Saka Tsüngrem tenarong aseni ayimtenba tsütsü lapoka lir. Pai ashir, ” Kü dang jaang, aser ni ne dang langzütsü” (Yr.33:3).
Süngyanglu külemba nung tejashitibaji asenoki külemba Tsüngrem mesüka asenok akümer. ” Nisung shia shibai parnok dak temulung lemdir, shirnoki parnok yanglu parnok mesüka akümtsü(t.18). Saka asenoki ochi aser taküm aliba Tsüngrem külemra, asenok Pa mesük akümtsü. Asenok Yisu Khrista mesükba nung melenshitsü.
Nai kechi külemer kümdangang.Satani Kibuba temelen aika agütsür. Pa jakdang tang tsüngremtem teyu; Pa dang külemang. Kibuba külemba nokdangba süngyanglutem indokang.