Sunil Arora-i CEC mapa agizükogo

New Delhi, Luchii/December 02 (Agencies): Tanü Sunil Arora-i Chief Election Commissioner of India, Om Prakash Rawat melenzüka CEC mapa agizükogo; pa India nung 23buba CEC asütsü.
2019 küm Lok Sabha elections ji Arora lenisüba nung agitsü, iba dak alia sangküm Jammu and Kashmir, Odisha, Maharashtra, Haryana, Andhra Pradesh, Arunachal Pradesh aser Sikkim state tem nunga assembly election ajakji pa lenisüba kübok agitsü.
CEC ka kümsükji küm 6 lir mesüra arishi küm 65 tashi, koba tama südir.
Arora ya 2017 küm August ita nung Election Commissioner shima liasü aser tawa Centre-i CEC atema pa tenüng agizükba sülen Rashtrapati Bhavan dangi benoka liasü.
Arishi küm 62 Arora ya tamalen information & broadcasting secretary inyaka liasü aser Skill Development and Entrepreneurship Ministry nunga secretary inyaka liasü.
1999-2002 küm Ministry of Civil Aviation nung pa Joint Secretary inyaka liasü aser Indian Airlines nung küm pongu CMD inyak.
1980-batch IAS officer Rajasthan cadre, Arora-i finance aser textiles Ministry den Planning Commission nunga inyaka aruogo.
Tanü CEC mapa agizükba sülen Sunil Arora-i, sangküm Lok Sabha election agitsü atema Election Commission-i rernemdar, aser iba election timi tajungtiba nung agitettsüji EC atema tongtibangtiba mapa asutsü, ta metetdaktsü.
“Yakta nungi telung maparenbo tenzüker liasü. Onoki lenla ajak- electoral register, EVMs den VVPATs, SVEEP mapatong, ETBPS (postal ballot) ajanga vote agutsübayim aser persons with disability (PwDs) atema renemdar,” ta pai metetdaktsü.
Osangbenertem den jembidang pai, “Kü batchmate aser commissioner, Ashok Lavasa den ano commissioner tasenba aser ECI nung külem tenzükertem, yimtenren party tem densema stakeholders, lokti tentet balala, melungtet teloktem osangbenertem ajaki Lok Sabha elections junga agiettsü atema shilem agitsüla,” ta mepishia metetdaktsü.