New Delhi, January 20 (Agencies): Bollywood actor, Aamir Khan-i taoba mapang teküp ayokba maparen nung shilem agir, actress Sunny Leone den aroki film-tem nung shilem agitsü mulunga aliba olen ka metetdaktsüogo.
“Aamir-i nü den aroki film nung shilem agitsü ta bilemer asü?” ta asüngdanga, Sunny-i taoba mapang pei teküp ayoktsü maparen inyakba atema taidok meshitsü olen ka osangbeneri Sunny den ajurutepa senden ka amendang metetdakja liasü.
“Sunny aitsübaji tim masüba maparen ka lir. Tim masüba tasüngdangbatem asüngdang aka, Sunny-i telangzüba tajung agütsüogo. Sunny-i taoba mapang aliba taküm yimya ni maitsür aser hau, ni la den film nung shilem agitsü mulunga lir,” ta arishi küm 50 tain Aamir-i Facebook aser Twitter ajanga metetdaktsü.
Tan Hokolbar nü sayatsü aliba Mastizaade film nung tongti shilem agir, arishi küm 34 tain Sunny-i osangbener den ajurutepba sülen nisung aikati la metenja la nungitba osang social media ajanga lemsatepogo.
Aamir-i Sunny metenja la den film nung shilem agitsü mulungba olen lemsatepba jakdang Vidya Balan, Rishi Kapoor, Anushka Sharma, Alia Bhatt, Shruti Haasan, Shahid Kapoor, Anil Kapoor aser Sushant Singh Rajput nunger densema, Bollywood nung tongti shilem agirtemi Sunny pusemba osangtem lemsatepba osang jangjaogo.
India nunger ajunga rongnung küm 2 tashi atonga Google asüla, taoba mapang bendanglen alila, Sunny-i Bollywood nung mezüngsüa shilem agir küma, lai 2012 küm Jism 2 film nung shilem aser yaküm, 2015 küm Ek Paheli Leela aser Kuch Kuch Locha Hai film na nung shilem agia liasü.
You must be logged in to post a comment Login