Sunrise Colony nung alirtemi DMC garitem nokdang ; Tanü Municipal Affairs Parl. Secy-i parnok den ajuruteptsü

Dimapur, August 11, 2017: Municipal Affairs Department-i Dimapur Municipal Council indang tang jana indokba tesem melenshitsü ta nangzükba ama meinyakba anema Hokolbar anepdang Sunrise Colony Council züngsemtemi anir kiyong nung alirtemi DMC indang jana indokba gari ajak nokdangba noksa nung angur. 

Dimapur, August 11 (TYO): Dimapur Municipal Council-i jana endokba tesem agientsü ta Municipal Affairs Department-i nangzükba ama meinyakba atema Hokolbar nungi Sunrise Colony Council-i anir kiyongertemi jana abenba DMC garitem ajak nokdangtsü tenzükogo.
Jana bener aruba garitem nokdangtsüba osangji jelia metetdakja liasü aser iba jagi DMC ketdangsertem, police aser Mahila Battalion o IRB jawantem Sunrise Colony anasa ata liasü. Iba mapang Naga Council Dimapur züngsemtem aser colony balala nungi GB temi Sunrise Colony pur dang garitem menokdangtsü atema mepishia liasü.
Ajisüaka, Sunrise Colony Council züngsemtemi mepishibaji magizük aser tenokdangbaji magien. Taoba mapang nangzükba ama jana endokba tesem mebelen tashi tenokdangba magientsü ta parnoki ashi.
Mapang talangka NGOs aser Colony Council tsüngda o atsütepa liasü.
Tanü lungkak aitba sentong nung school tanurtemia placards amer ghonda aika shilem agi.
DMC ketdangsertem aser police-i aiben mepishia jembiba sülen Sunrise Colony Council züngsemtemi onük ka nung ajemdaker tenokdangbaji agien.
Asüng Municipal Affairs Parliamentary Secretary-i jana endokba tesem semdangtsü aser Council züngsemtem den ajurutepa senden ka amentsü tangatetba nung tenokdangji agiena liasü.
Parliamentary Secretary-i Honibar anepdang 11:00 ako nung jana endokba tesem semdangtsü ta DMC Administrator-i NGO tem lia tezüluba nung nangzükba sülen tanü nikongdang 2:30 ako meta tenokdangbaji agien.
Asüng Parliamentary Secretary-isa Circuit House, Dimapur nung Sunrise Colony Council pur den senden ka amentsü.
Tang atemabo onükji angatettepogo aser tanü jana abenba garitem senzütsü melaogo aser asünga DMC-i jana kasa tesem nung endoktsü, ta DMC Administrator, Moa Sangtam-i tanü osangbener dang ashi.
Municipal Affairs Parliamentary Secretary, Zhaleo Rio-i asüngnep 11:00 ako nungi jana endokba tesem semdangtsü aser iba sülen Circuit House nung Sunrise Colony Council züngsemtem den senden ka amentsü, ta paisa shisem.