Supacat-i London nung Special Operations gari tasen ka sayaogo

London, September 16 (Agencies): Britain nung tentetba engineering telok, Supacat-i ‘Mk2’ ta ajaba LRV 400 Special Operations gari tasen ka London nung ayongba Defence & Security Equipment International Show (DSEI) sentong nung sayaogo.
Mk2 gari ya lenmang tenteta maliba tesemtem nung anishitsü asoshi mitkartem atema yangluba tongpang nung amshitsü All Terrain Vehicle (ATV) gari lir.
Iba gari ya Chinook helicopter tayimtsü ajanga arem aser iba amala tesemtemi bener aoba sülen arrür mitsü aser parnok amaktsü maparen nung amshitsü asoshi yangluba osang jangjaogo.
Nisung 4 tashi anitetba Mk2 gari-i ghonda nung mile 100 tashi jajateter aser totzü ken shiokba sülen iba gari-i mile 500 shi jajatetba osanga jangjaogo.
“Tongpang nung amshitsü osettsüset mesenloka aliba Mk2 gari amshia arrür den raraba sülen kasaji Chinook tayimtsü nung anioker tongpang raradak nungi tanga tesemi anir otettsü,” ta Supacat telok lenisang, Phil Applegarth-ia metetdaktsü.
4×4 tashi nungi 6×6 tashi küma ayong ayonga melenshitetba Mk2 gari-i tongpang nung amshitsü osettsüset pound 3,700 nungi pound 9000 dak tema taret ken nung bentettsü aser prangpong injanga sadema kadoktettsüsa gari indang suspension kanga junga renema lir.
Torque 256bhp & 600Nm agütsütetba V6 3.0 turbo diesel engine mesenlokba Mk2 gari nung 8-speed automatic transmission-ia mesenloka aliba osang jangjaogo.
Mk2 gari ya Supacat-i 2012 küm mezüngsüa sayaba LRV 400 gari tasenba lir.