Super 30-i tayimtsü yanglutepba nung takok angu

New Delhi, November 10 (Agencies) : IIT atema shisashirtem, Super 30 teloki Japan nung tayimtsü yanglutepba ka nung takok nguogo.
Super 30 telok ya September ita nung ‘solve and win’ tetoktepba ka nung alima rangben nungi telok semer den tokteper shimtet aser iba takok ajanga India nema tangteter, ta sangdong ka ajanga metetdaktsü.
Super 30 telok nung Ujjwal Priyank, Aman Nasim, Subham Raj, Aditya Prakash aser Sidhant Mohan nunger lir.
“Parnoki takok anguba sangdongba sülen parnok ajak nem kuli kakat kaka angütsüogo aser parnok takok anguba indang otsü ajaki jembir. Balakata Japan nungeri land of Buddha ta ajaba Bihar nung kanga bulua jembidar, ta sangdong ajangsa ashi.
Shisashirtem dang shiti agi tayimtsü kaka design sür yima sayutsü mapa lemzüktsü. Item tayimtsü rongnung shir teloki yangluba tekaraba aser tajungba yimdir parnoki takoker asütsü ta shir yanglutepdaktsü. Aser iba tetoktepba nung Super 30 teloki yangluba tayimtsü ayimdang nisung ajak kanga süngmanga parnok sempet tali jungkai adok.
Iba sülen 2000 küm Chemistry nung Nobel Prize angusang Japan nunger Hideki Shirakawa-i Super 30 pur pa indang lab-i anir oa plastic nung electric current jajaba sayuba den pai inyakba mapatem nungi experiment kar sayua liasü. Pai item Super 30 telok agi tenük kanga asüng.
Super 30 telok ngutetsang aser iba telok nung director Anand Kumar-i, tenüngsang anguba ajanga parnok kanga ajungmesoa pelateper, ta ashi.
“Takok kodanga sadanga mangur. Tejangraba aser nükjidong dak ajak keta lir. Item shisashirtem dak ajakji keta lir. Parnok dak aliba sempet kecha agia nembanga meyutettsü,” ta pai ashi.
Super 30 ya Kumar-i lapokba “Ramanujan School of Mathematics” lir.