Super Bowl nung Lady Gaga nem tenokdangba kar agutsür

January 18, 2017 (Agencies): Taruba ita Super Bowl halftime nung ken atendang yimtenren dak sendakba o kecha mejembitsü asoshi Lady GaGa nem tenokdangba agutsüogo, ta osang ka temai adok, saka National Football League (NFL) ajanga ashiba agi iba osangji tiyazü lir.
NFL ajanga ashiba agi, Lady Gaga Super Bowl nung politics indang jembitsü asoshi menokdangtsü. ‘Million Reasons’ ken atenlai Donald Trump aser politics dak sendakba nung o kecha mejembidaktsütsü ta osang adokbaji tiyazü, aser NFL-i tenokdangba kecha magütsü, ta jangjashiogo.
Maneni NFL-i ashiba agi, iba osang ya nungdak makaba nung nisungtemi mepetmesü adokdaktsütsü asoshi yangluba o ka lir. “Super Bowl ya nisungtem ajak longjemba mapang ka lir. Iba sentong nung nüburtem ajak jangratemdaktsütsü asoshi Lady Gaga renemdar, aser onoki la den iba sentong nung mapa inyaktsü asoshi jangrar. Olulu ajanga onok meinprong mesüdaktsütsü,” ta ketdangser kati ashi.
Tanga olulu ka ajanga ashiba agi, Lady Gaga stadium kilem kolak nung ken atentsü aser iba atema kilem nung tapok ka apatsü, saka iba osangji stadium denji kanga mapet, kechiyong NGR Stadium kilemji lapokli shibangli ta süteter. ” Onoki olulu nung ajemdaker kecha telangzüba magütsütsü, kechiyong ibaji ajanga maneni tai angateter aika adoker. Onoki iba sentong koda renema lir aji ata lir reprangang. Onoki Gaga dak kanga temolung alemer, aser lai iba sentong nung shilem junga agitsü,” ta parnokisa ashi.