Süpokrem agiba ken o nung Delhi ketdangser ka puogo

New Delhi, August 18 (Agencies): Delhi nung Special Metropolitan Magistrate RP Bhatia-i Lajpat Nagar nung dokan kibur ka dang nungi süpokrem 25,000 agiba ken o nung tanü CBI-i pa puogo.
Delhi nung Municipal Corporation ji Bhatia-i ketdangsüa repranger aser August 10 nü dokantem mita aoba mapang pai Alaknanda Market nung dokan kibur ka dang nungi süpokrem agiogo, ta pa anema tai tonglokja lir.
Special Metropolitan Magistrate, Central Zone, (Littering), Bhatia-i dokan kibur sang dangji okadaki arung ta ashi saka tesülen süpokrem sen 60,000 meshi.
“Tesülen süpokrem senji 25,000 tashi ajema alu. CBI-i sang toktsür mita ataba mapang Special Metropolitan Magistrate-i süpokrem 25,000 agizükdang jakdaka apu,” ta CBI otongdar kati ashi.
CBI-isa Bhatia’er ki-a mita reprangogo.