Suprem Court-i Meghalaya sorkar aitsü

Guwahati, Aenjeti/January 3 (Agencies): Meghalaya kübok East Jaintia Hills district nung nagmati aturtem anenbanger aliba mekümzüktetba atema Brehostibarnü Supreme Court-i Meghalaya sorkar aitsüogo.
Justices AK Sikri aser S Abdul Nazeer nati kümtetba bench ka ajanga Meghalaya sorkar dang kechiba ali agi anenbanger aiba nagmati aturtem mekümzüktet ta asüngdang.
News 18 sangdong ka ajanga ashiba agi, Meghalaya sorkar council-i okadak dang parnoki nagmati aturtem kümzüktsü asoshi jenjang tapet agiogo aser Center-ia teyari agütsüogo ta metetdakja liasü.
“Iba telangzüba ajanga onok temulung masür. Iba ya tasü taküm maparen ka lir,” ta bench-i ashiba den ali agi anenbanger alirtem atema sarasademtsüba metetdaktsü.
Meghalaya, East Jaintia Hills district kübok Ksan nagmati atudak nagmati aturtem December 13 nü anenbangba sülen tang tashi mekümzükteti aliba kümzüktsü atema jongdak jenjang ka agitsü asoshi mepeshiba angadangtsü atema SC-i agizüka liasü.
Aditya N Prasad-i benokba ken o ajanga tekümzükba maparen balala atema Standard Operating Procedure (SOP) ka renemtsü asoshi iba dak sendaka aliba ketdangser aser Centre nungi tetuyuba ka meshiogo.
Maneni bench ajangsa Prasad dang Centre nung temzüng ozüng anepaluba ketdangser ka dangi call asütsü asoshi tetuyuba agütsüogo, aji asünungdang tetuyuba tapet agütsütettsü.