New Delhi/Itanagar, January 27 (Agencies) : Arunachal Pradesh nung President’s rule agütsüba atema süoki ia bilema Bodbarnü Supreme Court-i Centre nem tetuyuba ka agütsüogo.
Iba dak sendakba nung January 29, 2016 matongdang Centre-i telangzüba ka agütsütsü asoshi tanü Supreme Court-i tetuyuba agütsü aser ano SC-isa Centre dang kechiba Arunachal Pradesh nung arsanga President’s rule agütsü ta asüngdangogo.
Tanü Supreme Court nung iba onük benoka angadangdang, SC-i Arunachal Pradesh Angh indang report meshi. Iba nung ajemdaker President’s rule alitsü telemtetba agia liasü.
Ano, SC-isa Arunachal Pradesh nung President’s rule alitsü telemtetba agiba nung Attorney General-i yaritepba osang meshiogo.
Cabinet-i Arunachal Pradesh nung President’s rule alitsü telemtetba agiba anema Congress-i Supreme Court nung ken o agütsü aser ibaji tanü angadang.
Mongulbarnü Tir Pranab Mukherjee-i Arunachal Pradesh nung President’s rule alitsü temelaba agüja liasü.
Iba onük ya February 1, 2016 nü SC nung ano angadangtsü.
Centre-i Arunachal Pradesh nung President’s Rule agütsübaji meshisadangi agütsü ta Bodbarnü All Arunachal Pradesh Students’ Union (AAPSU)-i aitsüogo aser parnoki iba anema lungkak aittsü ta metetdaktsü.
“Centre-i kuli tejangja mebushidangi telemtetba agiba anema onoki noktaktsü” ta AAPSU tir Kamta Lapung-i sangdong ka nung metetdaktsü.
State yimtiba nung lungkak aitba sentongtem ayongzüka agibaji law & order mejungi akümba masü, saka Angh iba nung ajemdaker yimjung nung aliba state ka nung Article 356 (1) alitsü ozüng agütsü, ta Lapung-isa sangdong nung shia lir.
Union Minister of State for Home Affairs Kiren Rijiju-i state sorkar loksa odaktsütsü atema tasa atonga inyak ta AAPSU-isa aitsüogo.
“Aruncahal nung BJP sorkar ka kümtettsü atema Rijiju-i iba tasa atonga inyak. Centre-i telemtetba meyipa magienra, onoki state ajungalen President’s rule agütsüba anema mass democratic movement ka tenzüktsü” ta AAPSU Tirisa metetdaktsü.
Bodbarnü taoba Arunachal Pradesh Chief Minister Nabam Tuki-i state Assembly nung pai aniba sorkari majority sayutettsü ta ashi.
“Onoki House nung onok majority sayutettsü. Ochii kodanga tamakok mangur aser shitakba jagi teti takok angur” ta paisa metetdaktsü.
You must be logged in to post a comment Login