Supreme Court-i Centre matsüngdang tasüngdangba teku benoker

New Delhi, December 09 (Agencies): Tanü Hokolbarnü maneni Supreme Court-i tamalen sorkari sen tamshidak anentsüba telemtetba anema benokba temepishiba ken o angadangba sülen Court-i Centre dang, iba mapatong ya telung nung meprokshii shitak inyak asü, ta asüngdangogo.
Sorkari sen 500 aser 1,000 notes anentsübaji linük Temzüng alema asü masü, iba obendang agütsütsü atema Supreme Court-i tasüngdangba 9 benok.
Chief Justice of India (CJI), T S Thakur-i, kechiba nisung kati hopta shia sen 24,000 agizüktettsü atema meinyaker, ta asüngdang.
SC-i, “Account shia hopta nung sen 24,000 agizüktettsü atema nenoki latet süra ibaji bank temi agütsütsüla,” ta ashi.
Sorkar tenüng nungi langzüa AG-i, saving account ka nung sen timtiba agi 24,000 agizüktettsü, ta ashi. Iba sülen CJI, TS Thakaur-i, süra kechiba minimum amount, tatishitsü agi sen 10,000 lateta mayur, ta asüngdang.
Temepishiba benoker atema okatsür, Prashant Bhushan-i Supreme Court dang, sorkar renema maliasü, aser sen anentsüba telemtetba sangdongba sülen tensa balala adokba atema parnoki meinyakteter, ta ashi.
Bhushan-isa, “ATMs nung sen maliasü, ATMs junga meyanglushi aser cooperative banks bo mezüngok,” ta ashi.
Sorkar pusema Rohatgi-i, nüburtemi ajangshiba timtem süngjemtsü atema Centre-i nüngdakba mera ajak agiogo, ta ashi.
AG-isa Supreme Court dang, sen agi anüngbaji anogo 15-20 tsüngda süngjemtsü, ta ashi.
Sen 1,000 aser 500 notes anentsütsü atema sorkari telemtetba agiba ajanga sensotem aser shishilembartem temeten agiener, ta Supreme Court nung temepishiba ken o aika benoka lir.
Temepishiba ka langzüa Mukul Rohatgi-i, sen tamshidak anentsübaji Centre indang Monetary Policy shilem ka lir aser iba nungji Court-i tiyongtsüi maittsüla, ta ashi.
Supreme Court-i maneni iba ken o ya December 14, 2016 nü angadangtsü.
Taoba hopta Centre-ia Supreme Court dang affidavit ka ajanga, iba telemtetba ya küm 70 tashi ochimashi sen rizünga aliba kaktettsü atema inyakba mapatong ka lir, ta metetdakja liasü.