Supreme Court-i Darjeeling Hills nungi sepaitem anientsü melar

New Delhi, November 27 (Agencies): Centre-i West Bengal kübok Darjeeling aser Kalimpong district tem nungi Central Armed Paramilitary Forces (CAPF) company 8 nungi 4 anientsü asüngdangba Hombarnü Supreme Court-i agizükogo.
Darjeeling aser Kalimpong nung mapa lemzükja aliba sepaitemji assembly elections agitsü aliba Gujarat state nung mapa lemzüktsütsü atema Supreme Court-i temelaba agütsü.
Chief Justice Dipak Misra aser Justice A M Khanwilkar o Justice D Y Chandrachud nunger züngsemba bench-i Centre-i company 4 anientsü asüngdangbaji agizük.
October 27 nü Supreme Court-isa Darjeeling aser Kalimpong district tem nungi CAPF company 15 nungi 7 anientsü atema Centre nem temelaba agütsü.
CAPF company temji Jammu & Kashmir indang arrtsü, northeast state tem aser Gujarat o Himachal Pradesh nung election mapang anüktsü atema mapa lemzüktsü.
Darjeeling hills nung state takhangba agüja tensa mejungi akümba atema Calcutta High Court-i October 27 tashi CAPF magieni atatsü atema tetuyuba agütsü. Iba ken o ji West Bengal state sorkari Centre telemtetba anema okadak benokba liasü.