Supreme Court-i NGOs asoshi tetuyuba agütsür

New Delhi, January 10 (Agencies) : Sorkari sen teyari agütsüba NGOs lakh 33 dak temai parnoki sen amshiba osang magütsüra Centre-i NGO tem anema ken o benoktsüla ta Mongulbarnü Supreme Court-i tetuyuba agütsüogo.
Supreme Court-isa March 31, 2017 tashi nung sorkar nungi teyari anguba NGOs ajak audit agitsü aser senotsü amshiba mita reprangtsü atema inyakyim ka tenzüktsü tetuyuba agütsüsemogo.
India nung NGOs lakh 33 shi sorkar nungi senotsü teyari angur saka itemj telok rongnungi lakh 3 shi kati ministry tem nem accounts agütsür. Tanüngba NGO temibo sen endokba mesüra amshiba osang kecha magütsür.
Item NGO temi sorkar kübok Ministry balala nung sen crore 9,000 shi teyari angur.
Maharashtra nung social activist Anna Hazare-i ketdangsüa reprangba trust ka anema PIL ka benokba sülen Supreme Court-i tanü tetuyubatem agütsüogo.
Hazare aser pa den yaritepertemi 1995 küm Hind Swaraj Trust tentet. Parnok ket nung sen 500 yur trust ji tenzük saka register masüdangyongi 1994-95 tsüngda parnok Centre nungi sen lakh 45 angu, ta PIL nung shia lir. 1995-96 nung iba trust-i state sorkar nungi sen lakh 65.85 agizük, ta PIL nungsa shisema lir.
Iba ken o nung ajemdaker Supreme Court-i sorkar sen anguba NGO ajak asoshi telemtetba agia osang metetdaktsüogo.