Supreme Court-i obendang agütsüba dangbo putu mendeni obendang agütsüba tematiba. S.Chuba Lkr

Mokokchung, August 21 (TYO) : Naga lima nungbo yimtak yimsüsürtemji MLA, Parliamentary Secretary aser Ministertem dang tematiba lir, kechiaser yimsüsürtem dak nüburtem tiptema aser lirepatsüka anitsü asoshi tashi lir, aji asünung Naga lima nung yimjung akatsü asoshi yimsüsürtemi yimtsüngtem nung nüburtem nem Naga lima nung yimjung akatsü asoshi inyaktsü angatetdaktsütsüla ta Veterinary & Animal Husbandary Parliamentary Secretary, S. Chuba Lkr-i August 20 nü Mokokchung yimtak Putu yimsüsürtem den telongjem sensaksem senden ka akadang ashi.
Parliamentary Secretary-isa Naga nunger telok NGO’s, Hoho aser arogotemi Naga lima nung yimjung asoshi inyakdar item dangji tulutiba yimsüsürtemi inyaktettsü, kechiaser yimsüsürtem dak nüburtemi angatsüsa yimyimji agutsütettsü tashi lir, anungji yimsüsürtemi zübazübaa mebilemi iba maongkaji agia Naga lima nung yimjung akatsü asoshi inyakang ta adenshia aliba yimsüsürtem ayongzüka ashi.
S. Chuba-isa Naga lima nung yimtsüng aika lir saka item rongnung tongtipang yimtsüngbo ishika dang lir, item tongtipang rongnung Mokokchung yimtsüng ya-a ka lir, kechiba ta süra Nagaland nung Mokokchung town-a tajungtiba aser tematiba rongnung züngshidaktsübaji Mokokchung yim yimsüsürtemi town nüburtem timi amokbanger aliba ajanga lir ta yimsüsürtemi tenüngsanga ashi.
Paisa Mokokchung district constituency 10 aliba nung Angetyongpang Constituency kübok town ward asem (3) tashi Mokokchung yim lushi nung lir, election agia aruba mapang nung khen danga item ward-tem nung rongrong madoki süngjema agibaji Mokokchung yim yimsüsürtemi timi amokbanga aniba ajanga lir ta tenüngsang agüja shisem.
Tangar yimtsüngbo pei yim sasep yimsüsüteper saka nenokbo town amokbangtsüsa yimsüsütsü khuret lir, anungji nenoki ano maneni khuret talila benoka ano akhi ama shisa ka-a Mokokchung ajungkettsü asoshi maneni inyakang, ta S.Chubai Mokokchung yimsüsürtem ajungshia ashi.
Parliamentary Secretary S.Chuba Lkr-isa Supreme Court-i obendang agütsüba dangbo yimtsüng nung putu tatar mendeni obendang agütsübaji tematiba lir, kechiba ta sürabangla Supreme Court-i obendang magütsütetba khuretbo putu mendeniang obendang agütsüteter, tanü yimsoshiba putu nung village council chairman-ji sorkari kanga dang akhümtsübur aser council member-temji sorkari meraketa repranger, anungji nübur tejakleni anitsü ashi nenok dak tashi alinung nenoki akhi ama Mokokchung ajungketba nung maneni shilem tajung agitsü amanga sarasadema atar ta ayongzüka ashi.
Iba sensaksem sentong nung Mokokchung Village Council chairman Imo Lkr-i sentong ketdangsüa aniba den ano 24th Angetyongpang A/C nungi lenirtem aser Mokokchung yim yimsüsürtemia shilem agia onük balala nung ajungshitepa jembiba mapang agia liasu.
Naga lima nübur ajak asoshi khuret tulu bena liaka yimsüsürtem den tangatetba tajung agi nübur khuret lemsatepba atema Parliamentary Secretary S. Chuba dang pelar ta Mokokchung yim yimsüsürtemi metetdakja liasü.