Supreme Court mangatettep anu metembang: Attorney General

New Delhi, Aenjeti 16 (Agencies): Supreme Court nung mangatettep adokba tembangogo, ta shir anogo ka dang lir iba tensa anu metembangteti lir, ta Attorney General KK Venugopal-isa Sangtennü ashi.
“Hao iba ken o anu metembangtet südi. Anogo ana asem tsüngta iba mangatettep ken o ajunga tembangtsü imla atati,” ta Venugopal-i ashi.
Chief Justice of India, Dipak Misra-i aniba obandangba bangdak nung inyakyim meshidak lir, ta Supreme Court nung obendanger tejen pezüi yimjak nung sangdongba sülen iba ken o tembangogo, ta AG-i Tentonü shia liasü. “Ajak angatettepogo ta ni amang…Ajak tazüokba nung lir. Ajak angatettepogo,” ta pai Tentonü shia liasü.
Obendangertem ya kata ajuru majuru, ta asüngdangba mapang, “Ni shinga majuru, Chief Justice densema majuru,” ta Venugopal-i ashi.
Senior-most judge pezüi Tentonü parnok indang court mapa akhi ama inyakogo, ta pai shisem.
Aenjeti 12 nung mangatettep adoka Supreme Court nung obendanger tejen pezüi osangbener den senden amenba ya paidoktet liasü aser obendangertemi tesendaktep tajung aliba kuli sayutettsü mechi külemi sangdong agütsütsüla, ta Venugopal-i shia liasü.
Justice Misra densema obendanger ajaki longjemer telemsa adokdaktsüba maparen ajak anendaktsütsüla, ta Rogonü osangbener senden nung obendanger pezüi jembiba sülen CJI ajurusang, Venugopal-i ashi.