Supreme Court nung Arunachal Speaker ken o angadanger

New Delhi, January 15 (Agencies) : State ka nung Angh dak tashi peria mali aser state assembly ka nung teka amoka tetuyuba agütsütsü pa dak tashi mali, ta Hokolbarbü Supreme Court nung Arunachal Pradesh Speaker menden nung anentsür Nabam Rebia-i ashi.

“Assembly nung Angh ka dak tashi peria mali. Paji assembly inyakyim ketdangsütsü atema shimtsüba masü. State assembly ka madak pai tetuyuba agütsütsü tashi agüja mali” ta Rebia atema okatsür Senior lawyer, Kapil Sibal-i Justices Jagdish Singh Khehar, Dipak Misra, Madan B Lokur, Pinaki Chandra Ghosh aser Justice NV Ramana nungeri aniba bench dang ashi.

Rebia-i Supreme Court nung Meghalaya Angh Jyoti Prasad Rajkhowa anema ken o ka benok aser ibaji tanü angadangdang, pa atema okatsüri item kuli agütsü.

Arunachal Pradesh nung Congress legislature party nung telemsa adokba ajanga iba ken o ya adokba lir. Iba ken o ya maneni Hombarnü angadangtsü.

December 16, 2015 nü Itanagar nung aliba Community Hall ka nung Deputy Speaker menden ser agiba Assembly session ka nung temulung masüba Congress MLA 14 den BJP MLA kar densema pa ozüng alema Speaker menden nungi atsüngdok, ta Rebia-i aitsür.

You must be logged in to post a comment Login