Supreme Court obendang ajanga lenla aika nung ajangzüktsü: Yechury

New Delhi, August 24 (Agencies): Brihostibarnü CPI-M tongti lenir, Sitaram Yechury-i, Supreme Court-i, ‘right to privacy’ ya fundamental temeten ka lir, ta obendang agütsüba ajanga sensotem lenla balala aika nung ajangzüktsü, ta metetdaktsü.
“Sorkari India nunger nem ‘right to privacy’ temeten magütsütsü atema sentong tamajung liasü, saka sorkar sentong tamajung anema rarar- lawyer tem, meimchir temeten atema inyakertem aser tangartem nem tenüngsang agütsür, aser pelar,” ta tanü Yechury-i twitter ajanga metetdaktsü.
“Iba obendang ajanga lenla aika nung tajangzük angutsü, kechiyong tanü lima nung asen taküm nung technology ajanga tongtibang shilem agir,” ta paisa ashi.
Pai ashiba agi, sorkari nüngdak ajak atema Aadhaar amshidaktsüba aser foreign technology company temi osang balala tim mesüi amshiba anema Communist Party of India-Marxist-i nokdaker.
“Iba obendang ya ajanga asen temeten kümzüka ayutsü atema lenmang lapoktsütsü,” ta paisa shisem.
Tanep Supreme Court-i, ‘right to privacy’ ya fundamental temeten ka lir aser ‘right to life & liberty’ indang tongtibang shilem ka lir, ta obendang agütsüba sülen Communist Party of India-Marxist leniri iba o ya jembi.