Süpu aadang sürem shisa

Alima nung asenoki rongsen bushidang aiben mebilemdangi inyaker, iba jagi tilaka ajangzükdang tuluka raksar. Ibaji Aor tadakrutsü nung süpu aadang sürem shisa ama ta asüba den kasa ataloker. Tetezü asen agitsü mapa tilaka inyakdang teraksa-ang tuluba adokdaktsür. Item mapa rongnung tanü asen lima nung ali telonglen aliba mijang (nakmati /coal) aturtemi inyakba mapa ya ka asütsü. Atangji, Tsüngremi asenok nem ali tema aser telong nung rongsen aika moaja lir, anungji itemji bushiteta agitsübaji asenok mapa lir. Tangarbo pei lima nung Tsüngremi moatsüba rongsentem bushiteta agiba agi takar küma anisüngzüka alir, saka asenokbo ali rongsen jenti aremokja liaka asenoki mebushitetba ajanga alimabo takar saka asenokbo sensaker ta timatemer. Aikati ali telong nung akaba rongsen totzü ama mesüra mijang amaji agiteta mamshitsüla ta bilemer aser nokdanger saka mamshibaji dang takoksa asütsü. Tatishitsü ka, tanü asen lima ali telonglen totzü aika atsüngdena lir saka agiteta mamshir. Ajisüaka, tangar renloka aoba lima nungbo joko küm ishika sülenbo tzü mopong memenendaktsütsü atema totzü atsükba gari mamshitsü telemtetba agir. Iba tangatetba nung asenoki asen nem moatsüba temoatsütem bushia agitsü merangtsübaji tim dang lir. Ajisüaka, kanga tongtibang temetettsü kaji, asenoki kodangsa ali telong nungi mijang ama agiteta agidir, iba jagi tzü mopong memenentsüsa aser nübortem tali majung akümtsüsabo meinyaktsüla. Kechi mapa inyakdir inyakaka tanü ajung asaa masü saka tarutsü putusa putu lia aotsüba purtem asoshi bilemja inyaktsübaji kanga tongtibang lir. Tanübo asenoki ali telong nung mijang bushia ali tuyonga aoba agi alijak nung arem maka kümdaktsüba dang masü saka iba tesem aser temeket nung joko kodanga kecha memeyitsüsa asenoki alima raksaa yutsür. Tesasatsü kaji, mijang atuba ali telong nungi miim tango ka adoker aser iba jagi mijang atuba anasa aliba ayong nung taküm aliba ajak südaktsür. Aji oda, asenoki ali telong nung mijang tua rongsen bushidang asenoki tarutsü chirnurtem asoshi mebilemi inyakba ajanga, parnok atemabo süngdong meyitsüsa ali maka aser ayong nung ango akong pua achitsüa mali takong toktsür. Shitakba agibo, item ajakji shirnok lushi nung inyakdir yangji aliba yimten, lokti tentet aser kaketshir telongjemi kanga süoki ia item mapatemji reprangtsüla. Ali telong nung akaba rongsen bushibaji shitak, bushitsüla. Ajisüaka, rongsen bushidang iba liji tanaben magitettsüsa asenoki meinyaktsüla. Iba tangatetba nung mijang aturtemi parnoki mijang tuteta bener aoba kasa tesemtemji tangalen nungi ali tua bener arua jungjunga nembanga yutsütsüla. Kodang mijang atudakji matu ama ali tasen agi melemmelema nembangtsüdir, ano yang nung jagi süngdonglidong meitsü aser tarutsü putu nunga kasa liji amshia rongsen poktetdaktsütsü akoktsü. Iba amaji asenoki rongsen bushiba ya asenbo tuluka ajangzüktsü saka tang alir aser tarutsü putu nung alitsüba lanurtembo jungjunga akoksatsüsa meinyaktsüla. Nagaland tesem aika nung ali mijang atuba agi joko alushi tulu aika tanaben magtettsüsa kümogo. Ano, karbo yim dena belentsüsa akümtsüba tia nung lir. Iba ama rongsen bushiba mapajibo tamashi mesüra nübortem ashioktsüba mapa ka asütsü. Rongsen bushiba mapa aika rongnung kanga dang tekümdangtsü mapa kaji mijang atuba mapa ya asütsü. Asenoki iba mapa ya timi meinyakba agi, asenok rongsen aika samadagi aser joko temang nung dena kongshia shirangdaktsür. Joko, mijang atuba tesem aser temeket nung alirtem karbo miim tango agi tebok nung bena aliba tanur dak dena kongshiba agi matamabensa asoba lir. Iba amaji asen temang nunga tashidak aikati kongshir. Itemji süpu aadang sürem shisa ama, rongsen bushidang tajangzük anguba dang nungi meyirijang terben agi tali takoksaba asütsüsa inyaktetba mapatem   asütsü. Tang nungibo asenoki kechi nung koba mapa inyakdir inyakaka, tang tilaka tajangzük agitsübaji dang masü saka tarutsü putu nung alitsü purtem asoshi inyaktsür ama bilema inyakdi.