Sushma-i China lenir Yi den Masood Azhar onük süoka jembi

Moscow, April 18 (Agencies): Tanü Hombarnü Moscow yimti nung India External Affairs Minister, Sushma Swaraj-i China External Affairs Minister, Wang Yi den UN-i kiralongrar ta sangdongtsü aliba JeM tongti aser Pathankot amakba sentong asameyanger tongti, Masood Azhar anema inyakba nung China-i tetsükdaktsü bener arutsüba onük süoka jembiogo.

Russia yimtiba, Moscow nung Russia-India-China (RIC) senden alidang China-India senden ka jurila ka amendang Swaraj-i China lenir den iba onük süoka jembi.

Ketdangsertem osang ajanga ashiba agi, Swaraj-i iba onükji densema tongtibang onük aika süoka jembiogo.

Tan ita tetenzüklen UN sanctions committee-i Azhar ji kiralongrar ka ta sangdongtsü aliba China-i nokdanga liasü.

UN nung India-i Pakistan nung amenoka aliba telungpur teloktem aser lenirtem anema inyakba nung China-i tetsükdaktsü bener arutsüba ya tang mezüng masü.

2001 küm UN-i Jaish-e-Mohammad (JeM)-i nokdangogo ajisüaka 2008 küm Mumbai amakba sülen India-i Azhar anema inyaktsü atema maparen tenzük, ajisüaka UN nung tashi aliba linük China-i ibaji nokdanga liasü.

Pakistan-i Mumbai amakba sentong asameyanger tongti, Zaki-ur-Rehman Lakhvi chiokba anema India-i UN nung Pakistan anema inyak, ajisüaka China-i ibaji nokdanga liasü.

Taküm January 2 nü kiralongrartemi Pathankot nung air base amakba sülen Febrauary ita nung India-i UN dang shidi ka ajanga UN Sanctions Committee kübok Azhar tenüng züluoktsü benokba sülen Counter- Terrorism Executive Directorate (CTED)-i kuli bushia liasü.

Iba sülen US, UK aser France linüktemi pusema technical team-i züngsemtem dangi benok, ajisüaka ibaji agizüktsü ghonda ishika dang lia China-i UN designation committee dang ibaji sota atatsü mepishi.