Sushma-i jembiba o Cong-i aitsü

Jaipur, August 06 (Agencies): Tanü Lok Sabha senden nung External Affairs Minister Sushma Swaraj-i, lai Lalit Modi masü saka cancer agi shiranger pa kinüngtsü yari ta metena jembiba nung ajemdaker Congress otongdar Manish Tiwari-i, kechiba lai kasa temeim mapaji UK nung India nunger nisung merirjang aika asoshibo meinyak, ta ashi.

Brihostibar nü Jaipur nung osangbenertem senden ka nung jembidang Tiwari-i, “India nunger, talisa Punjab nungi nisung merirjang aika lanur asüba mapang UK-i aoba sülen temzüng alema idakji alir, aser parnok kidangi shilanga pei tsüraburtem ajurutsü asoshi visa atema Indian embassy dang teyari meshidagi. Item India nunger asoshibo kechiba minister-i temeim mesayur (?) India nung parnok anema keno-a benoka mali,” ta ashi.

Tiwari-isa ashiba agi, Sushma-i British sorkar dang, Lalit Modi sadem-sadema ainlen senzü yonga India-i ashishia mali ta shiogo.

“Tan aliba NDA sorkar tashii marudang, UPA sorkari (UK dang) Lalit Modi nem iba ama teyari agütsüra ibaji ajanga India-Britain tesentaktep kongshitsü ta shidi züluogo,” ta Congress lenir Tiwari-i ashi.

Swaraj den Rajasthan aser Madhya Pradesh Chief minister tem menden nungi aludaktsütsüla ta shia pai, “Onoki tim nung takhangba agütsür; nüburtem ola nokdanga Parliament nung rongrong adokdaktsürtemji sorkar lir,” ta ashi.

Iba onük nung Ato kilonser Narendra Modi aija Tiwari-i, Gujarat rara ajanga Ato kiloseri par minister tem dang menden nungi alung, ta ashitsü temelung moluteter,” ta ashi.