Sushma-i Sri Lanka Tir Sirisena ajuru

Delhi/Colombo, February 06 (Agencies): Honibarnü External affairs minister, Sushma Swaraj-i Sri Lanka Tir, Maithripala Sirisena ajurua southeast Asia aser International onüktem aika benoka jembiogo.
Hokolbarnü Swaraji anogo ananü atema Sri Lanka semdanga liasü aser Tir Sirisena den senden tajung kaogo, ta Indian high commissioner to Colombo, Y K Sinha-i ashi.
“Tiri, linük ana tsüngda tesentaktep junga aliba ya tesüiba küm merirjang aika nung ajemdaker yangertetba lir ta jembiogo,” ta Sinha-i ashi.
Ghonda ka shi senden nung linük ana leniri India-i Sri Lanka nung project balala inyakba indang aser taoba mapang tongti ketdangsertemi semdangba mapang lemteta aliba onüktem nung o lemtep kaogo.
“India-i Sri Lanka nung project aika temelung süa inyakba indang jembi aser India-i yarisemba atema Tir-i India dang pelaba lemsatepogo,” ta Sinha-isa ashi.
“Tir Sirisena-i minister dang regional aser international onük balala nung terenlok indang metetdaktsü. Tena onük aika nung o lemtepogo,” ta pai ashi.
Yashi Colombo nung 9buba Joint commission senden nung lemtetba onüktem nung tenati lepshia o lemtepogo.
Tena senden amenba sülen Swaraj-i taoba Tir Chandrika Bhandaranaike Kumaratunga-a ajuru aser linük ana tesentaktep onük jembi.
Linük ana tsüngda tesentaktep onüktem benoka jembitsü atema Joint commission ya 1992 küm tenteta liasü.
Yaküm February ita nung Tir Sirisena-ia India semdanga liasü aser India Ato kilonser, Narendra Modi-i yaküm March ita Sri Lanka semdanga liasü.