Sushma Swaraj-i anir teshimtet telok ka Mother Teresa Canonisation sentong nung adentsü

New Delhi, September 02 (Agencies): External Affairs Minister, Sushma Swaraj leniba nung züngsem 12 teshimtet telok ka Deobarnü Mother Teresa nem ‘temeshi nisung’ narokum agütsüba sentong (canonization) sentong nung adentsü atema tanü Rome-i apusoa ogo.
Anogo asemnü semdangba mapang Foreign Minister, Sushma Swaraj-i Italy Foreign minister, Paolo Gentiloni den jurila senden ka amentsü, aser ibaji United Nations tribunal-i 2012 küm Kerala tzüyimkümlen India nunger angopur ana tepsetba atema tai tongloktsüba ken o nung Italy nunger marines ana chioktsü atema obendang agütsüba sülen linük ana tsüngda temaba jenjang nung tang mezüng senden amener asütsü.
Sorkar osang ajangasa ashiba agi, tan hopta tatemlen Swaraj-i Italy lenir ajurua linük ana tsüngda tesentaktep reprangshitsü.
India nunger angopur ana tepsetba ken o nung India-i Italy nunger marines ana- Salvatore Girone aser Massimiliano Latorre na apuba sülen linük ana tsüngda tesentaktep mejungi aküm.
Iba ken o nung India nunger judicial inyakyim ajanga mulung mesüi Italy-i UN Tribunal nung iba ken o benok, iba sülen taküm May ita nung Girone chioktsü temelaba agütsü aser Latorre bo temang majungba ajanga Italy nung lir.
Central sorkar nungi teshimtet telok ka dak alia West Bengal chief minister, Mamata Banerjee aser Delhi chief minister, Arvind Kejriwal na lenisüba nung state ana nungi teshimtet telok balala ana Mother Teresa canonization sentong nung adentsü atema Rome-i apusoa ogo.
Swaraj-i aniba Central telok nung Union Minister for Food Processing Industries, Harsimrat Kaur Badal, Lok Sabha MP tem- Professor K V Thomas, Jose K Mani, Anto Anthony aser Conrad K Sangma aser Goa Deputy Chief Minister Francis D’Souza nunger densema lir.
Kasa telok nung Supreme Court Justice, Kurian Joseph, nüngtugu lawyer Harish Salve, Secretary General of Catholic Bishops’ Conference of India, Theodore Mascarenhas aser K J Alphons nungera dena lir.
Taküm March ita nung Pope Francis-i, Missionaries of Charity tentetla, Mother Teresa nem ‘temeshi nisung’ naroküm agütsütsü ta sangdonga liasü.