Sushma Swaraj-i Iran, Russia semdangtsü apusoa ogo

New Delhi, April 16 (Agencies): External affairs minister, Sushma Swaraj-i Iran aser Russia linük na anogo pezü semdangtsü asoshi tanü Honibarnü New Delhi nungi apusoa ogo. Iba mapang nung la Tehran nung bilateral joint commission senden nung adentsü aser iba sülen Russia yimtiba, Moscow nung China aser Russia External affairs minister tem den senden amentsü.
Tehran nung Sushma-i Iran foreign minister, Mohammad Javad Zarif den senden amentsü aser India-Iran Joint Commission senden nung den-a iba senden nung linük ana tesentaktep onük aika jembitsü.
Taoba hopta nunga Union Petroleum Minister, Dharmendra Pradhan-i Iran semdanga liasü. Iba den külemi hopta ana tejaklen Ato kilonser, Narendra Modi-i Saudi Arabia semdanga liasü.
Totzü dak alia Iran nung India-i Chabahar port ama connectivity project inyakdar, koba ajanga Central Asia aser Afghanistan sentakteptsü.
April 18 nü Moscow nung Russia-India-China (RIC) foreign ministers senden nung Sushma-i Russia foreign minister, Sergei Lavrov aser China foreign minister, Wang Yi ajurutsü.  India-i UN nung Jaish-e-Mohamed tongti, Masood Azhar nokdangtsü atema inyakba maparen nung China-i tetsükdaktsü bener arutsüba onük Sushma-i Wang den süoka jembitsüa akok.
India-i Russia dak melungtok tembar ka ama melung lemteter, aser yaküm December ita nung Modi-i Moscow semdangba mapang linük ana tsünda defence densema tanga onüktem nung amalitepa inyaktsü tezüngzüktep kar agiogo.
Sushma-i twitter ajanga, Russian medical college hostel mi lendong nung India tsür kaketshir ana asüba onük süoka jembitsü, ta metetdaktsüogo.
“Ni Moscow-i aoer. Mi lendong nung asen senso Pooja Kallur aser Krishna Bhonsle na asüba ken o tatemsabuba bushisüngdang osang atemaa ni süoka jembitsü,” ta lai ashi.