Sushma Swaraj-i Israel aser Palestine semdangtsü

New Delhi, January 12 (Agencies): Linük Tir, Pranab Mukherjee semdangna sülen ita asem lir External Affairs Minister Sushma Swaraj-ia January 17 aser 18 anogo tem nung Israel o Palestine na semdangtsü.

External Affairs Minister kümer Swaraj-i West Asia tan mezüng semdangtsüba lir aser India-i iba tesem nung inyakyim ulushiner.

Lai tamasa Palestine semdangtsü aser yangji aliba linük lenirtem den tangatettep tajung nung amalitepa inyaktsü atema olemtep ka akatsü.

“Lai tan semdangba ajanga India-ia Palestine yimsüsübaren aser terenlok tsütsü nungitba tali jangja metetdaktsütsü,” ta metetdaktsüdang, External Affairs Ministry nung otongdar Vikas Swarup-i ano linük ana tsüngda yimtenren tsütsü tesendaktep tali akhangshitsü, ta shisem.

January 17 nü Palestine nung nüngdak tebanga jembir külen, kasa anogo nung anogo ananü asoshi Swaraj Israel-i aotsü aser iba mapang lai Israel nung yimten lenirtem den senden amentsü aser tang kanga tashi ita aliba India o Israel na tesendaktep kanga junga asadangtsü.

India ya Israel nunger dang raradang amshiba sepaitem oset timtiba alir linük ka lir. Israel-i prangpong tapu balala, missile aser tayimtsütem aika India dang yokogo ajisüaka iba yoktepba ya tangar linüktem dang kanga jangjabo memetetdaktsü.

Yaküm Israel Ato Kilonser Benjamin Netanyahu-i India semdangba ajanga Swaraj-ia tan Israel semdanger amai ka lir.

Swaraj-i tan ya Tel Aviv-a semdangtsü sentong lir.

Linük Tir Pranab Mukherjee-i yakükm October ita nung Tel Aviv semdanga liasü aser ibaji India Tir kati semdangba rongnung mezüng liasü.

Tel Aviv nung Swaraj-i Israel Tir Reuven Rivlin, Ato Kilonser Benjamin Netanyahu, Defence Minister Moshe Ya’alon, National Infrastructure Minister Yuval Steinitz aser MLA tem den senden amentsü sentong lir.

“Linük kati linük ka semdanga aliba ajanga tesenkatep aser tangatettep tali akhangshir,” ta Israel Embassy sangdong ka ajanga ashi.

“India External Affairs Minister kati Palestine ssemdangba ya tan mezüng asütsü,” ta MEA otongdarisa ashi.

Palestine nung aliba nüburtem libaliro nung terenlok bentsür arutsü atema India-i yangji project aika tenzüka inyakdar.

Tan semdangba mapang Swaraj-i, Ramallah nung Palestine Digital Learning & Innovation Centre lapoktsütsü.