Sushma Swaraj-i Maldives semdangtsü

New Delhi, October 10 (Agencies): Honibar nungi tenzüka India-Maldives Joint Commission senden nung adentsü atema External Affairs Minister, Sushma Swaraj-i anogo ananü Maldives semdangtsü aser iba mapang lai iba linük den energy, anema-alibaren, shishilembaba aser defence nung amaliteptsü atema jembitsü.
Tesüsabuba Joint Commission sendenji 2000 küm liasü. Küm 15 lir sülen ang tang Swaraj-i Maldive semdanga tanaben akasodaktsütsü.
Iba sendenji Swaraj aser Maldives External Minister, Dunya Mamoon na lenisüba nung agitsü.
“Male (Maldives yimtiba) nung aliba mapang lai Tir Abdulla Yameen ajurutsü aser Defence, Economic development aser Health minister tem den-a senden amentsü,” ta MEA otongdar Vikas Swarup-i ashi.
“Item senden ajanga shishilembaba aser investment nung lenmang lapoktsü onoki imlar, Maldives nung terenlok nükjidong yutettsü, iba den külemi anema-alibaren, energy aser HRD nung amalitep tajungba akümtsü imlar,” ta paisa ashi.