Sushma Swaraj-i Pak PM Nawaz Sharif ajuru

Islamabad, December 09 (Agencies): India aser Pakistan napronglai tesentaktep yanglutsü kanga merangba mapang ka nung tanü Bodhbar nü Islamabad nung Foreign Minister, Sushma Swaraj-i Pakistan Ato kilonser Nawaz Sharif ajuruogo.
“External Affairs Minister (Sushma)-i Ato kilonser Sharif dang India-i kidanger tesentaktep junga yanglunüba indang shiogo,” ta foreign ministry otongdar, Vikas Swaroop-i ashi.
Swaraj-isa Pakistan foreign minister Sartaj Aziz dena ajurutep.
Tanep ‘Heart of Asia Summit’ nung lai, India aser Pakistan nati linük ana tsüngda amaliteptsü atema temulung lemteta alitsü mapang tongogo, ta jembia liasü.
“Shishilembabaren tashi taitba akümtsü aser amaliteptsü atema asenok kati ka dak temulung lemteta alitsü mapang tongogo,” ta Swaraj-isa ashi.
Laisa Pakistan dang, par litsü ajanga Afghanistan nungi India-i osettsüset belentsü atema temelaba agütsüdaktsüner, ta shiogo.
“Azü jajaba tezü nokdangra ‘Heart of Asia’ ajanga mapa meinyaktettsü. Afghanistan atema India nükjidongji, iba linük ya shishilembaba tongtibang ka ama akümtsü atema tesentaktep, transit, energy aser iba linük den tongtepratep lenmangtem kadaktsüner,” ta laisa ashi.
Swaraj-isa, “Onok tsütsülen nungi, Pakistan-i aginüba jenjang tashi ka nung India-ia onok tsütsü nungi amaliteptsü renema dang lir. Ajisüaka tanübo asenoki Afghanistan yaridi,” ta ashi.
Taruba “Heart of Asia” senden sangküm India nung akatsü, aser iba senden nung adentsü atema Swaraj-i Pakistan, China, Afghanistan aser shilem agiba linüktem nungi foreign minister ajak jaokogo.
Tanü Islamabad nung osangbenertem den jembidang Swaraj-i, sangküm South Asian Association for Regional Cooperation (SAARC) senden nung shilem agitsü atema Ato kilonser Narendra Modi-i Pakistan semdangtsü, ta metetdakja liasü.