Sushma Swaraj-i video ka ajanga Meira Kumar aitsü

New Delhi, June 25 (Agencies): Tanü Union minister, Sushma Swaraj-i video ka ajanga opposition party temi shimba linük Tir candidate, Meira Kumar aitsüogo.
2013 küm Lok Sabha nung Sushma o tejembidak nung taoba mapang Speaker, Meira Kumar-i tiyongtsüi ia benjaba indang video ka lai (Sushma) lemsatep.
Iba mapang nungji Swaraj-i, UPA sorkari ochimashi inyakba onük jembia liasü.
2013 küm April ita nung atalokba minute 6 video den külemi Sushma-i twitter ajanga, “Lok Sabha Speaker Meira Kumar-i Opposition lenir (Sushma) matsüngdang yamai benshi,” ta metetdaktsü.
BJP-i aniba NDA sorkari Tir election atema Ram Nath Kovind shima lir, aser opposition candidate, Meira Kumar-i pa den tokteptsü.
External affairs Union minister, Sushma-isa twitter ajanga osangkaket report ka yamai lemsatep, “Sushma-i minute 6 onük jembidang Speaker-i 60 ben tashi tiyongtsüi ia benja.”
Iba mapang nungji Swaraj ya Lok Sabha nung Opposition lenir liasü, aser lai Manmohan Singh-i aniba Centre sorkari senotsü nung ochimashi inyakba aija, “India nüjiso ngur sülen ochimeshitiba sorkarji UPA” lir, ta aija liasü.
Video nungi Meira Kumar-i Sushma dang “kanga pelar” aser “ai süra” ta aiben shia lir.
NDA sorkari Tir election atema Bihar Angh aser Dalit lenir, Kovind shimba sülen anogo ishika tsüngda opposition party temi Tir candidate atema Bihar nungi taoba mapang Union Minister, Speaker aser Dalit lenir, Meira Kumar shim.
Taoba mapang Deputy Ato kilonser, Jagjivan Ram’er jala arishi küm 72 Kumar ya tetsür rongnung mezüngbuba Lok Sabha Speaker inyaka liasü.