Sushma ya jilushi aitsü nung mongin: Sonia Gandhi

New Delhi, August 07, 2015 : Lok Sabha nung Congress MP 25 anentsüba anema Hokolbar nü Parliament House kima Congress Tir Sonia Gandhi, tatong Tir Rahul Gandhi, senior lenir Ghulam Nabi Azad aser party MP temi yimyim ayima lungkak aitba noksa nung angur.

 New Delhi, August 07 (Agencies): Yashi Parliament nung External Affairs Minister Sushma Swaraj-i, lai Lalit Modi yari masü saka pa kinüngtsü yari, ta jembiba dak sentakba nung tanü Congress Tir Sonia Gandhi-i, Swaraj ya jilushi aitsü nung mongin, ta aija jembiogo.

Lok Sabha Speaker-i Congress MP 25 anogo pongunü anentsüba asoshi maneni lungkak aitba dak sentakba nung tanü Congress tatong Tir Rahul Gandhi-i External Affairs Minister dang, taoba IPL mendenbuba Lalit Modi tepuokdaki meyokba atema pa dang nungi lar kibong sen kwi angu’ar rasa-a ashitsüla, ta shiogo.

Yashi Parliament nung Sushma-i Portugal doctor temi Lalit Modi kinüngtsü cancer agi shirangba osang aser Modi kinüngtsüi agütsüba sangdong zünga ashiba sülen lai, “Pa kinüngtsüji tesüiba küm 17 tashi cancer agi shiranger aser iba tashitak agi 10benbuba shiranger. Ni ya asüngdanger, ni ajuruba ama kasa tensa ka ajuru nunga Sonia Gandhi-ia kechi inyakla (?). La (Modi kinüngtsü) südaktsütsü asoshi lai (Sonia) odang toktsütsü asü (?),” ta ashi.

Sushma-i la aija jembiba o nung ajemdaker Parliament kima osangbenertem den jembidang Congress tongti Sonia-i, “Sushma Swaraj ya jilushi ka air, la ya jilushi aitsü nung mongin. Atangji nung, ozüng alema meinyaki ni kü tajungtiba agi yarila (Lalit kinüngtsü),” ta ashi.

Sushma anemasa Sonia’er jabaso aser Congress tatong Tir Rahul-ia, Lalit Modi aser la (Sushma) dak sentakba ken o ajungaji, auyaba mesüka telung nung miima ayur, ta ashi.

“Kodang auer ka arudir, tatalokba ana alir. Kechisa atalokdir ibaji miimshia inyaker aser senotsü belenteper. Sushma-i inyakbaji miimshia inyak aser lar ministry nem metetdaktsüi inyak,” ta Rahul-i ashi.

Osangbenertem den jembidang Rahul-i, “Lalit Modi yaria tepoukdaki meyokba atema lar kibong, lar jala aser kinüngbui pa (Lalit) dang nungi sen kwi angu’ar Sushma-i linük nüburtem dang ashitsüla,” ta ashi.

Rahul-isa, tetsüibo (Sonia) minister-i inyakba amaji meinyakla, ta shisem.