Suu Kyi-i 1 buba Myanmar linük sentaktepshitsü senden agiogo

Naypyitaw yimti kübok Parliament Lower House nung senden amenba jakdang Parliament Speaker, Shwe Mann (Abelen)-i Myanmar opposition lenila, Aung San Suu Kyi den ajurutepba noksa nung angur. (Naypyitaw, November 19)

Naypyidaw, November 19 (Agencies): Myanmar opposition lenila, Aung San Suu Kyi-i Myanmar sorkar lenisütsü menden toktsütsü aliba tongti lenir ka den ajurutepa par linük nung nungdakba yimtenren temelenshi agitsü onüktem tanü Brehostibar nü benoka jembiba osang jangjaogo.

Ajisüaka, Suu Kyi aser Myanmar Lower House Speaker, Shwe Mann nati tanü kechi telemtetbatem agi iba osang tejangjabo tang tashi alima dang memetetdaktsüi lir.

Tan Naypyidaw yimti nung amenba senden ya Suu Kyi aser Myanmar lenirtem tsüngda amentsü ayongba sentaktepshitsü senden 3 rong nung mezüngbuba lir.

Myanmar Tir, Thein Sein aser mitkar lenisang, Min Aung Hlaing natia tarutsü mapang nung Suu Kyi den ajurutepa sentaktepshitsü senden amentsü mulungba osang tawa metetdaktsüogo.

Tan ayongba sentaktepshitsü senden ajunga takok ngua amentsü asoshi ita ka dak tema agitsü akok ta Myanmar Information Minister, Ye Htut-ia tanü metetdaktsüogo.

“Suu Kyi-i aniba National League for Democracy (NLD) yimtenren teloki tan agiba general election nung takok anguba sülen par teloki ozü Myanmar sorkar tasenba tenteta linük lenitsü maparen nung tetsükdakba ajurutsüsa tang timtem kecha adoka mali,” ta pai ashi.

Mynmar sorkar tasenba tentettsü maparen nungita yaritsü asoshi Tir Sein-ia nangzüka lir aser Suu Kyi-ia lar züngsemtem dang süngjema alitsü ajungshia lir ta pai shisem.

Tan November ita 8 nü agiba election nung NLD teloki Union Solidarity & Development Party (USDP) yimtenren telok madak takok ngua Myanmar sorkar tasenba tentettsüsa tang jenjang tajung ngua lir.

Ajisüaka, bendanger den kibong akümer mesüra pei chirnuri bendang senso agia alir ka nem linük Tir menden abentsü temeten magütsütsü asoshi linük temzüng nung lateta aliba yong Britain nunger den kibong akümba den külemi, jabaso anapronglai Britain senso agia alila, Suu Kyi-i Myanmar Tir menden abentsü temeten monguteti lir.