Suu Kyi-i Canada Foreign Minister, Dion den ajurutep

Naypyitaw, April 07 (Agencies): Myanmar Foreign Minister tasenba, Aung San Suu Kyi-i lar linük semdanger, Canada Foreign Minister, Stephane Dion den Naypyitaw yimtiba nung tanü, Brehostibar nü ajurutepba osang jangjaogo.

Mitkartemi yimsütsü tashi abenba inyakyim toktsür Myanmar nung tan mezüngsüa nüburtemi shimba yimsüsürtemi sorkar tentetba atema pelaba olen ka Dion-i lemsatepa liasü.

“Linük ka nung democracy yimsüsütsü yimya tashi ita benshitsüji kanga dang tasak lir. Ajisüaka, Myanmar nung democracy yimsüsütsü yimya asangsang nung benokba ngua kanga pelar. Myanmar-i maneni democracy inyakyim tali tashi itshia benshitsü ajungshir,” ta Dion-i tajungshiba olen ka metetdaktsü.

Nobel sempet agizükla, Suu Kyi-i Dion den ajurutepba jakdang China aser Italy foreign minister na dena tan hopta tetenzüklen ajuruba osang jangjaogo.

Yaküm 2015 küm November ita agiba election sentong nung Suu Kyi-i aniba National League for Democracy (NLD) yimtenren teloki takok tulu ngua par telok kijai Myanmar sorkar tasenba tentettsüsa jenjang tajung ngua liasü.

Ajisüaka, linük temzüngi bendanger ka den kibong akümer mesüra pei chirnuri bendang senso agia alirtem nem linük Tir menden mebendaktsütsü lateta aliba yong, Britain nunger den kibong akümba den külemi, jabaso anapronglai Britain senso agia alila, Suu Kyi-i Myanmar Tir menden abentsü temeten mongutettsüsa jenjang tamajung ajuruogo.

Yamaji tensa ka ajuruba yong Suu Kyi-i lar tembar, Htin Kyaw shima pa nem Myanmar Tir menden abentsü jenjang agütsü aser Kyaw-i toaba hopta nungi tenzüka Myanmar Tir menden abentsü tenzüka lir.

Ano külen, NLD teloki aniba Myanmar parliament tasenbai par ozüng latettsü maparen inyaka, Suu Kyi atema ‘State Counsellor’ menden tan Mongolbar nü tentetja la nem linük Ato Kilonser menden den sako tashi agütsüogo.

Suu Kyi-i iba lenisütsü mendenji benokba sülen linük temzüng ajangdanga, lar Myanmar madak yimsütsü asütsü tashi ngua lir.