Suu Kyi-i election nung shilem agitsü atema tenüng züluokogo

Myanmar opposition lenila, Aung San Suu Kyi (Achijilen)-i taküm November ita agitsü ayongba parliamentary election nung candidate ka ama tokteptsü nükjidong nung Yangon tezülen, Kawhmu district nung tentetba election commission office kidang la tenüng züluokba noksa nung angur. (Kawhmu district, July 29)

 Yangon, July 29 (Agencies): Myanmar’er democracy lenila, Aung San Suu Kyi-i taküm November ita agitsü ayongba election nung candidate ka ama shilem agitsü atema la tenüng tanü Bodbar nü züluokogo.

Mitkari nungitba yimtenren telok den election nung toktepa lai tang benoka aliba parliament menden maneni abentsü nükjidong nung nung Suu Kyi-i la tenüng züluoker lir.

Taküm November 8 nü agitsü ayongba election nung Suu Kyi-i aniba National League for Democracy (NLD) yimtenren teloki parliament menden 498 prongla agizüktsü nükjidong nung toktepa shilem agitsü sentong renemba osang ka NLD otongdar, Nyan Win-i metetdaktsü.

La pusemertemi NLD wako ayipshia, ‘Long live Mother Su’ ta ola tulu adoka ayimtena atadang, Suu Kyi-i Yangon anülulentip tsütsü densemba Kawhmu district constituency nungi election nung candidate ka ama tokteptsü asoshi la tenüng züluoka liasü.

2012 by-election nunga lai kasa constituency nungi candidate ka ama shilem agia takok anguba osang jangjaogo.

Iba by-election sentong nung Suu Kyi aser lar NLD lenirtemi parliament menden 42 nungi menden 41 tashi akok saka mitkartemi aniba parliament nungbo lar teloki akokba parliament mendenji kanga dang ajema züngoktsüsa aküm.

Myanmar parliament election nung shilem agitsü renemba yimtenren telok ajungai pei candidate tenüng züluoktsü asoshi taruba August ita 8 nü tashi mapang lapokja lir.

Tanü parliamenty election nung candidate ama shilem agitsü asoshi tenüng züluok aka, arishi küm 70 tain Nobel Peace sempet agizükla, Suu Kyi-i Myanmar Tir election nungbo candidate ka ama shilem magitettsüsa tang jenjang ajurua lir.

Bendanger den kibong akümer mesüra pei chirnuri bendang senso agia alirtem nem Tir menden asoshi candidate ka ama tokteptsü temeten magütsütsü asoshi Myanmar linük temzüng nung lateta lir.

Aji oda, Suu Kyi-i Britain nunger ka den kibong akümba den külemi, lar jabaso ana tashi Britain senso agia aliba yong lai Tir election nung shilem agitsü temeten mongutettsüsa tetsükdakba ajurua lir.