Suu Kyi-i Myanmar nung Naga nunger semdang

Guwahati, March 9 (Agencies): January 29, 2019 nü Myanmar Army-i Sagaing Region nung National Socialist Council of Nagaland (NSCN-K) indang headquarters atsünga agiba sülen state counsellor Aung San Suu Kyi-i Sagaing Region semdanga Naga nunger den ajurutep.
State counsellor aser National League for Democracy (NLD) chairperson Aung San Suu Kyi-i March 6 anogo nungi semdangtsü tenzük. Lai Sagaing Region nung Kani, Homalin aser Naga self-administered zone nung Lahe semdanga Naga nunger den ajurutep, ta osang ajanga ashi.
March 7 nü Suu Kyi-isa upper Sagaing Region kübok Thamanti semdang.
Iba mapang Naga Students’ Organisation (NSO)-i la nem memorandum ka agütsü.
March 6, 2019 nü NSO-i agütsüba shidi nung “Naga Students’ Organization (NSO) ya linük nung Naga nunger kaketshir ajak indang telok tongtiba lir aser onoki na pelashishia agizüker” ta ashi.
“Na tanü yangi aruba ya otsüsütsü lir aser iba ya ozü putiotsü nung teti atema züluoktsü. Anungji iba maongka agia onoki onok tepela aser tejashi ajak lemsatepnür” ta NSO-isa ashi.
Onoki aiben kaketshirtem yariang ta shiogo aser Naga nunger aliba tesemtem nung education system ajungkettsü atema mepishi saka mapa meinyaker. Myanmar kübok Sagaing Region nung aliba Naga nunger ya Myanmar sensotem ama agizüktsü mepishir, ta kaketshirtemi Suu Kyi dang ashi.
Parnokisa la dang Naga putiotsü aser Naga nunger ‘International’ ta lemsaba khuret angatettsü atema mepishi.
Naga nunger ya tashi tait linük ana- Myanmar aser India nung lemdanger alir, ta NSO-i ashi.
Mandalay aser Mongywa ama yimtitem nung oa mezüngtetertem asoshi college aser ‘technology college’ ka lapokjang ta NSO-i Suu Kyi dang mepishi.
Myanmar army 500 shi kati January 29 nü NSCN-K headquarters makdoka liasü.
Myanmar Army-i NSCN-K dang senso masüba telungpur ajak meindoktsü atema tetuyuba agütsü saka parnoki tashi mangaba ajanga iba mapa inyak ta osang ajanga ashi.