Suu Kyi-i Myanmar Tir o mitkar lenisang na den ajuruteper

Myanmar yimtiba, Naypyitaw kübok presidential palace nung senden ka amenba jakdang Myanmar Tir, Thein Sein (Abelen)-i Myanmar opposition lenila, Aung San Suu Kyi den teka amtepa tanü Bodbar nü ajuruba noksa nung angur. (Naypyitaw, December 02)

 Naypyitaw, December 02 (Agencies): Myanmar nung democracy yimsüsütsü yimya benoktsü asoshi nokdakla, Aung San Suu Kyi-i Myanmar Tir, Thein Sein aser Myanmar mitkar lenisang, General Min Aung Hlaing na den tanü tsüngdong ajurutepa senden menogo.

Lar National League for Democracy (NLD) yimtenren teloki taoba November ita 8 nü agiba parliamentary election nung takok anguba sülen Myanmar linük indang yimsüsütsü tashi benoktsü terenemshiba agia, Suu Kyi-i tanü Myanmar nung tashi tulu abener ana den ajuruteper lir.

Taoba mapang Nobel Peace sempet agizükla, Suu Kyi-i minute 45 shi agia Tir Sein den ajurutepa par linük indang yimsüsü menden melenteptsü den sentakba onüktem tanü benoka jembiba osang jangjaogo.

Suu Kyi-i mitkar lenisang, Hlaing dena par office kidang ajurutepa tanü ghonda ka dema agia senden mena liasü.

Suu Kyi’er NLD yimtenren teloki Myanmar yimsüsütsü tashi benoktsü temeten nguaka, lar NLD telok o mitkar na tsüngda amalitepba ajanga dang sorkar tasenba takok ngua aotsü kechiyong Myanmar mitkar lenirtem nem parliament menden noklang nung shilem 25 tashi agütsütsü asoshi linük temzüng nung latetja lir.

“Suu Kyi aser ozü lenisang, Sein nati Myanmar yimsüsütsü menden melenteptsü den sentakba onüktem tanü senden nung benoka jembiogo,” ta Sein’er otongdar, Ye Htut-i tesülen metetdaktsü.

“Timtem kecha majurui Myanmar yimsüsütsü menden melentepa, Suu Kyi-i aniba NLD yimtenren teloki Myanmar sorkar tasenba tentetsü onük tanü ozü lenir anati benoka liasü,” ta pai shisem.

Myanmar yimsüsütsü menden melentepba maparen nem timtem kecha magütsütsü tenangzükba ka Tir Sein aser General Hlaing napronglai taoba mapanga metetdakja lir.