Suu Kyi-i Rakhine state tsüngdong semdangtsü ajungshir: UN

United Nations, December 09 (Agencies): Myanmar madak tenüng magi yimsü asüla, Aung San Suu Kyi-i tang mepetmesü tensa ajurua aliba Rakhine state tsüngdong semdangtsü tajungshiba olen ka United Nations (UN)-i tanü, Hokolbar nü metetdaktsüogo.
Myanmar anüdoklentip tsütsütsülen, Rakhine state nung nütsüng yongsük jenti alir Buddhist nüburtem aser nisung ajema alir Muslim nunger Rohingya kin na tsüngda raratep adokba sülen tensa azüoktsü atema yokba Myanmar mitkartemi ozüng alema inyakbaren manentsüba atema alimai Nobel Peace sempet agizükla, Suu Kyi aitsütsü tenzüka lir.
Taküm October ita nungi tenzüka, Myanmar mitkartemi par mitkar tashi amshia, tashiyim inyaktsü tenzükba ajanga Rohingya nunger nisung 20,000 dak temai Rakhine state toktsür arrtsü adena, Bangladesh nung jenokba osang angazükogo.
Mitkartemi tetsürtem aika khen nung tashiyim agi taküm raksatsüba, nüburtem oda tepsetba aser iba amala tashiyim mapa kanga sashia inyakba kuli Bangladesh nung jenoktsü tenzüka alirtemi metetdakja liasü.
Ajisüaka, “Rakhine state nung tensa azüoka lir,” ta shia, alimai tensa tamajungba kümdaktsütsüsüa o mejembitsü temepishiba olen ka taküm 2016 küm March ita nungi tenzüka yimsüsütsü menden abentsü tenzükla, Suu Kyi-i metetdaktsüogo.