Suu Kyi-i Rohingya Muslim tem tepsetba anendaktsütsüla: Razak

Kuala Lumpur, December 4 (Agencies) : Aung San Suu Kyi-i, Myanmar nung Rohingya Muslim tem tepsetba anendaktsütsü atema tongti shilem agitsüla, ta Deobarnü Suu Kyi-i kecha meinyakba atema la aija jembiba mapang Malaysia Ato Kilonser Najib Razak-i ashi.
Kuala Lumpur nung nisung 5,000 adenshia aliba senden ka nung jembiba mapang Najib Razak-i, “Myanmar sorkari parnok anüolen tsütsü iba azüdokshiba anendaktsütsüla. Iba tesem nung aliba Rohingya nunger Muslim amangertem aika tesem toktsür jenaogo, tetsür aika tashiyim agi raksatsüogo, rishi kangshiogo aser nisung tepsetogo,” ta ashi.
“Aung San Suu Kyi-i nobel prize angubaji kecha atema?” ta ola tulu adoka ayimtena aliba telok dang Najib-i asüngdang.
“Onoki Aung San Suu Kyi dang joko ojangji ojang ta shiner… Onoki Muslim amangertem aser Islam kümzüka ayutsübasa,” ta pai ashidang, teloki Tsüngremsa tuluba (Allahu Akbar) ta shia agizük.
“OIC(Organisation of Islamic Cooperation)-ia iba dak sendakba nung teinyaktsü tim inyakdaktsür. Imlibilema langka tanga inyakang. UN-ia langkabo inyaktsüla. Iba ama nisung tepsetba mapa alimai repranga dangbo malitsüla,” ta Najib-i ashi.
Rakhine anüdoklentip army temi maka aruba nungi jenbutsü atema tawa ang Rohingya nunger parnok nisung 10,000 dak tema Bangladesh-i jenaogo, ta Bodhbarnü UN-i metetdaktsü.
Bangladesh tonga arurtemi AFP dang Myanmar security force temi tetsür tashiyim agi raksatsüba, rishi kangshiba aser nisung tepsetba taoksatsü osang aika shiogo.
Myanmar-i item otsüji tiyazü ta metetdaktsüogo, ajisüaka parnoki bendanglen nungi aruba osangbenertem aser bushisündangertem iba tesemi maitdaktsür.