Suu Kyi-i tatembangba Myanmar Parliament senden nung aden

Myanmar opposition lenila, Aung San Suu Kyi (Tiyongtsü)-i tatembangba parliament senden nung shilem agitsü asoshi Yangon nung tentetba Parliament lower house ki tonga aoba noksa nung angur. (Yangon, November 16)

Yangon, November 16 (Agencies): Myanmar opposition lenila, Aung San Suu Kyi-i tan sorkari tenteba parliament senden tatembangba nung tanü, Hombar nü shilem agiba osang jangjaogo.

Tan amenba parliament senden ya Tir Thein Sein lenisüba kübok tatembangba parliament senden amener lir.

Tawa agiba Myanmar parliamentary election nung Suu Kyi-i aniba National League for Democracy (NLD) yimtenren teloki sorkar aser mitkartemi nungitba Union Solidarity & Development Party (USDP) yimtenren telok madak takok ngua sorkar tasenba tentetsü temeten angütsüsa jenjang tajung ngua lir.

Ajisüaka, Myanmar linük temzüngi bendanger ka den kibong akümer mesüra pei chirnuri bendang senso agia alirtem nem Myanmar Tir menden abentsü temeten magütsüba yong Britain nunger den kibong akümba den külemi, jabaso anapronglai Britain senso agiba aliba yong Suu Kyi-i Myanmar Tir menden abentsü temetenbo monguteti lir.

Ano külen, Myanmar-i otsüsütsüsa election takok ngua agiba atema pelaba olen ka Tir Sein aser Suu Kyi naprongla den lemsatepba den külemi, Suu Kyi-i Tir menden abentsü temeten angutsüa linük temzüng melenshitsü densema, Myanmar-i democracy inyakyim den sentakba temelenshi agitsü tajungshiba olen ka White House foreign policy advisor, Ben Rhodes-i taoba hopta metetdakja lir.

“Suu Kyi aser lai aniba NLD teloki tan election nung takok tulu nguaka, mitkartem nem parliament menden noklang nung shilem 25 tashi mekazükja lir. Anungji, Myanmar linüki nungdakba temelenshi agitsüla,” ta pai shisem.

Ano, “Election sentong metembangi lir,” ta shia, NLD züngsemtemi peisasa azüoka alitsü tajungshiba olen ka Suu Kyi-ia metetdaktsüogo.

“Myanmar nung nüburtemi aginüba temelenshi agitsü maparen nung election nung takok anguba ya mezüngbuba mera lir. Aji oda, sorkar tasenba tentetba sülen nungdakba temelenshi bener arutsütsü nangzüker,” ta lai ashi.

Myanmar nung mitkar lenirtemi yimsüsütsü tashi küm 50 shi abenba sülen 2011 küm nungi tenzüka nübur lenir nem yimsüsütsü tashi agütsür külen Myanmar-i tan mezüngsüa democracy yimya benshia election agir lir.