Suu Kyi o Narendra Modi na tangatettep ken o renem

New Delhi, Oct. 19 : India aser Myanmar na tsüngda tanü Bodbar nü tangatettep ken o asem renema yuogo. Iba tangatettep ken o ya India tenüng nung ato kilonser, Narendra Modi aser State Counsellor aser Myanmar Foreign Minister, Aung San Suu Kyi na tsüngda renema liasü.
Myanmar lenir Aung Suu Kyi ya anogo asemnü asoshi Delhi nung arua lir aser tanü tesüsaba anogo nung kin ana tsüngda iba terenemba ken o ji renem.
India-i Myanmar nung terenlok mapa inyaktsü asoshi temulungtetba tulu lir ta Myanmar lenir Aung San Suu Kyi den külem ser terenlok mapa inyaka aotsü atema ken o renem dang PM Modi-i ashi.
“Alima ana lenirtemi tangatettep ken o renemba wadangji power, banking aser insurance,” nungertem liasü ta External Affairs Ministry spokesperson Vikas Swarup-i metetdaktsü.
Item tangatettep ken o renemdang , onük (memorandum of understanding) ka power sector nung yariteptsü, kaji Reserve Bank of India o Central Bank of Myanmar na tsüngda yariteptsü aser tasembubaji Myanmar nung Insurance industry tajungba kümdakja inyaktsü atema kin ana leniri sign süa liasü.
India ato kilonser, Modii Myanmar lenir Aung San Suu Kyi den yaritepa inyaktsü ken o ka metetdaktsü dang, ” Nü leniba nung Myanmar maparen ajak nung tanü putu den sütepa renloktsü merangdang, India nü den alitsü, ” ta ashi.
“Onok külemi inyaktsüba wadangji aluyimbaren, power aser renewable energy nungertem alitsü”, ta paisa metetdaktsü.
PM Modi-isa ashiba agi, India aser Myanmar na prongla arrtsülen anüktsü tebilemtsü alinungji, iba ama mapa nunga yaritepa aotsü telemtetba agiogo.
Aung San Suu Kyi-ia Narendra Modi o tajung meyipja ashidang, ” India ya alima nung democratic lima tulutiba asünungji onoki kanga nükshir aser kin ana telongjem nung tebilemtsü ajak koka aotsü ta onoki amanger,” ta paisa ashi.
Yashi Mongolbar nü Aung Suu Kyi-i India tir Pranab Mukherjee aser External Affairs Minister Sushma Swaraj na ajurua liasü.
Aung San Suu Kyi ya par lima temzüng agi tir asütsü memelar saka Myanmar yimten tashijibo la dak lir. La ya Nobel peace senpet angur rongnung ka lir. Lai aniba National League for Democracy (NLD) teloki Myanmar nung takok ngua government akümba sülen tang la mezüng India limai aruogo.
La Delhi tonga marudang, Goa nung BRICS-Bimstec Outreach Summit nung dena liasü.
La marudang, taküm küm August ita nung Myanmar tir U Htin Kyaw-i India semdanga liasü.