Suu Kyi’er NLD teloki Myanmar sorkar tasenba tentettsü renemshir

Naypyitaw, January 29 (Agencies): Myanmar parliament senden nung tepila sentong tanü, Brehostibar nü agiba sülen Myanmar nung democracy yimsüsütsü yimya benoktsü asoshi nokdakla, Aung San Suu Kyi aser lai aniba National League for Democracy (NLD) yimtenren teloki Myanmar sorkar tasenba tentettsü renemshiba osang jangjaogo.
Yaküm 2015 küm November ita agiba election nung takok tulu anguba sülen NLD teloki 1960s sülen tan mezüngsüa democracy inyakyim benshia sorkar tentettsü renemshir lir.
Yaküm election nung parliament menden noklang nung shilem 80 shi ajangzükba NLD teloki taruba Hombar nü nungi tenzüka Myanmar yimsüsütsü tashi benoktsü sentong renema lir.
Mitkartemi taoba küm 49 shi tashiyim agi yimsü asüba sülen 2011 nungi tenzüka Tir, Thein Sein-i mitkartemi nungitba sorkar tenteta Myanmar madak yimsü asü aser taruba hopta nungi tenzüka Suu Kyi’er teloki par linük indang yimsüsütsü tashi benoktsü.
Tanü Naypyitaw yimtiba nung agiba tepila sentong nung yimsüsütsü menden toktsür aser yimsüsütsü tashi benoktsü alir yimsüsür ajunga den mitkar lenirtemia shilem agiba osang jangjaogo.
Mitkartemi toaba mapang latetba linük temzüngi mitkartem lenirtem nem parliament menden noklang shilem nung shilem 25 tashi agütsütsü aser security minister 3 tashi mitkar lenirtem nungi shimtsü latetja aliba yong NLD teloki mitkar lenirtem den amalitepa par linük madak yimsü asütsüsüa akümtsü.
Mitkar lenirtem nem yimsüsü tashi agütsüba den külemi, Suu Kyi-i Tir menden mebentettsüsa ocet lateta aliba yong Myanmar linük temzüngji aritepa mesüaka, tarutsü mapang nung melenshia yanglushitsü alizüng NLD yimsüsürtemi yua lir.
Yimsüsür tasentemi taruba hopta parliamentary speaker shimtsü aser parnoki tesülen Tir tasenba shimtsü sentong renema lir.
Ajisüaka, tanü tashi nung Myanmar Tir menden abentsü asoshi yimsüsür shiba shimtsü iba osang alima dang memetetdakja mali.
Linük temzüngi memelaba ajanga lai Tir menden mebentet aka, lai Myanmar madak yimsü asütsü ta Suu Kyi-ia taoba mapang metetdakja lir.
Tarutsü hoptatem nung Parliament upper house, lower house aser mitkar yimsüsürtem rong nungi Tir shimtsü yimsüsür tenüng ka ka benoktsü aser parnoki yimsüsür 3 rong nungi yimsüsür ka Myanmar Tir inyaktsü asoshi shimtsü.
Tesülen, Tir tasenbai sorkar tasenba tenteta taküm March ita tatembanglen nungi tenzüka Myanmar madak yimsü asütsü.