Suu Kyi’er sorkar den tesendaktep junga lir: Myanmar mitkar

Myanmar yimtiba, Naypyitaw nung National League for Democracy (NLD) yimtenren telok lenila, Aung San Suu Kyi (Tiyongtsü)-i lar yimsüsürtem den senden ka amenba sülen parliament ki toktsüdang agiba noksa ka yangi angur. (Naypyitaw, May 13)

Naypyitaw, May 13 (Agencies): Myanmar lenila, Aung Sung Suu Kyi-i aniba Myanmar sorkar tasenba den tesendaktep junga aliba olen ka Myanmar mitkar lenisang,  Senior General Min Aung Hlaing-i tanü, Hokolbar nü metetdaktsüogo.
Suu Kyi-i aniba National League for Democracy (NLD) yimtenren telok yimsüsürtemi tentetba Myanmar sorkar tasenba kübok mitkartemi tetsükdakba kecha majurui par maparen inyakba olen ka pai metetdakja sorkar tasenba aser mitkar na tsüngda mangatetepbaren kecha maliba olen ka pai metetdaktsü.
Suu Kyi-i aniba sorkar tasenba aser mitkar na tsüngda tesendaktep ajungba ajanga dang küm jenti mitkar yimüsütsü kübok lir külen tang nüburtemi shimtetba lenirtemi yimsüsütsü tashi benokba Myanmar linük nung tensa junga terenlok alitsü.
“Nüburtemi shimba yimsüsürtemi tentetba sorkar magizüktsüsa ken o kecha mali aser ozü miktartemi sorkar tasenba kübok mitkar mapatong ajunga takok ngua teinyakdak lir,” ta Hlaing-i shisem.
Tesüiba mapang, 1962 nungi tenzüka, mitkartemi tashiyim agi linük yimsüsütsü tashi benoka küm 50 shi Myanmar madak yimsü asüba sülen mitkartemi nungitba sorkar nem yimsüsütsü tashi 2011 küm amoktsü aser yaküm, 2015 küm November ita mezüngsüa tetsükdakba kecha meli election agia nüburtemi par yimsüsürtem shima liasü.
Yaküm election nung Suu Kyi-i aniba NLD teloki temaba jenjang angu aser taküm April ita nungi tenzüka Myanmar indang yimsüsütsü tashi benok.
Ajisüaka, mitkartemi taoba mapang latetba linük temzüngi mitkartem tashi tulu agüja aliba yong mitkar lenirtem den amalitepa tesendaktep junga ayuba ajanga dang Myanmar sorkar tasenbai par yimsüsütsüren takok ngua abentsüsa tang jenjang lir.
Mitkartemi 2008 küm latetba linük temzüngi bendanger ka den kibong akümer mesüra pei chirnuri bendang senso agia alir lenirtem nem linük Tir menden abentsü temeten magütsüi aliba yong Britain nunger ka den kibong akümba den külemi, jabaso anapronglai Britain senso agia aliba yong Suu Kyi-i Myanmar Tir menden abentsü temeten monguteti lir.
Aji oda, lai linük lenisütsü menden abentsü maongka monguaka, lai sorkar tasenba nung foreign minister menden abenba den külemi, balala tentettsüba State Counselor mendena bena, Suu Kyi-i tenüng magi lar Myanmar madak yimsü asütsü tenzüka lir.