SVEEP campaign kübok PWDs atema sentong ka agi

Dimapur, Metsüremi/March 20 (TYO): Tanü DC Conference Hall, Dimapur nung SVEEP campaign kübok PWDs atema awareness sentong ka agiogo; iba sentong nung tetushi tejaokerji Disability Commissioner, Nagaland, Diethono Nakhro liasü, ta aketdangsertem osang ka ajanga metetdaktsü.
Iba sentong nung jembidang lai, election mapang nung aser tanga mapangtem nung matamabensartem dak kangabo merangloker, ta ashi.
Laisa PWDs atema ketdangsertemi awareness programme ayongzüka katsüba atema kettdangsertem dang poelaba metetdaktsü.
“Vote agutsütsü temeden ya meimchirtem temeden rongnung ka lir, ajisüaka matamabensar voters mapang talangka sendoka liasü. Matamabensartem temeden angatetba aser iba dak sendakba onüktemji tang tashi asen lokti nung kangabo mezüngshir,” ta lai ashi.
“Tangatetba tai ajanga tang tashi matamabensartemi tayongzükba aika ajurur,” t alai shisem.
Lai kibongtem, anepalurtem, melungtet teloktem aser temiemertem dang matamabensar voters dang vote agutsütsü atema ajungshitsü ayongzük.
“Tang tashi matamabensartemi parnok temeden memetetba tensa ka nung asenok lir. parnok dang sayutsüpur aser anepalurtem asenoki nüngdaker,” ta lai ashi.
Lai ashiba agi, tawa Election commission of India-i “No voter to be left behind” yimyim nung ajemdaker matamabensartem election inyakyim nung shilem agidaktsütsü ayongzükogo.
Laisa CEO-i mera aika agia inyakba atema pelaba metetdaktsü.
Sentong nungsa matamabensartem nem pledge card lema agutsü aser EVM/VVPAT amshiyim sayua liasü, ta ksa osang nung shia lir.