SVEEP Mobile Van aser District SVEEP Election Anthem saya

SVEEP Mobile Van and District SVEEP Election naklu ken sayaba sülen Kohima DC & DEO Rajesh Soundarajan IAS den Methaneilie, District Administration aser DBs külemi agiba noksa nung angur. 

Dimapur, Aenjeti 30 (TYO): Aenjeti 29, 2018 nü DC & DEO Kohima, Rajesh Soundararajan IAS-i SVEEP Mobile Van aser District SVEEP Election Anthem sayatsü.
Kohima DC indang Conference Hall nung sentong ka agidang Rajesh Soundararajan-i ashiba agi, SVEEP Mobile Van tenzükbaji election dak sendakba maparen tali tejangjaba nung metetdaktsütsü atema lir.
EVM aser VVPET amshiyim sayuba den külemi election posters alemtsü atema iba Mobile Van tenzüker ta paisa shisem.
Iba sentong nung mendenji ADC & RO Kohima, T. L. Kiusumong Tikhir liasü aser pai ashiba agi district administration-i Mobile Van ana anepalu aser gari anaji Kohima district kübok Assembly Constituency 7 sema senzütsü.
District SVEEP Election Anthem ji Naga nunger nüngtugu kentener Methaneilie-i mejemba lir aser pa-a iba sentong nung aden.
Methaneilie-i o jembidang, district administration-i clean election atema mapa tajung inyakba atema tenüngsang agütsür ta ashi.
Iba naklu ken ajanga kija shia dangi clean election osang sangoktsütsü aser ibaji ajanga taruba election nung tajangzük tulu angutsü, ta Methaneilie-isa metetdaktsü.
Methaneilie-isa District SVEEP Election Anthem ji Tenyidie aser Nagamese oshitem nunga saya.
Sentong nung Assistant Election Officer, Kohima, Toshimeren Aier-i okila jembidang, SVEEP maparen kübok shilem ka ama SVEEP Mobile Van aser SVEEP District Anthem sayar ta metetdaktsü.
Election maparen indang tali metetdaktsütsü aser clean election osang sangdongtsü atema iba mapa inyaker, ta paisa shisem.