Swaach Bharat mapa nung nübortem ajak shilem agidaktsütsüla

Dimapur, Dec.18 (DPRO) : Linük ajaklen merüka ayutsü asoshi tenzükba sentong Swaach Bharat mapa ya nübortem ajaki shilem agia inyakba mapa amato inyaktsüsa district shia nung ‘brand ambassador’ shimteta alirtemi nübortem den külemi shisa tasen bendenloka inyaktsüla ta Nagaland angh, P.B. Acharya-i metetdaktsü.
Tanü Hokolbar nü Police House, Chumukedima nung Swachh Bharat atema shimba  brand ambassador-tem den jembidang, merüka alitsübaji Tsüngem mesüka aliba amato lir ta asüba tangatetba ajak nem agüja inyaktsüla aser itemji parnok tekolok shisatsü nung enoktsütsüla ta paisa ashi.
Angisa state merüka alitsü asoshi Swaach Bharat sentong ajanga brand ambassador-temi inyakba mapatemji Ministry of Urban Development, Government of India-i aginüba ama internet nung angutsüsa enoktsütsüla ta metetdaktsü. Alima merükba sentong kodangsa ayongzükdir, iba sentong nung pa tendaktsünüra teti mulunga lir ta anghisa ashi.
Iba sentong nung Dimapur atema shimba brand ambassador Wb.Geoffrey Yadeni Swachh Bharat Website ka lapoktsü shidang aser aji ajaki mulunga agizüka ayu. Tang nungibo iba  Nagaland Swachh Bharat Website nung state tesem balala nung merükmejuba sentongtem ayongzüka akabatem enoka yutsütsü.
Iba senden nung adenertemi ano tang nungi asentenshir lokti tentettem den külem  ser alima merüka ayutsü asoshi inyakba mapatem tashi itshia aotsü jembitepa liasü.