Swachh Bharat Abhiyan atema Big B nübo asüngdangogo

New Delhi, July 04 (Agencies): Swachh Bharat Abhiyan ajungkettsütsü atema Bollywood actor, Amitabh Bachchan dang nübo asüngdangogo.
Centre sorkari pa dang iba campaign atema pa ola aser nübo agüjang ta asüngdangogo.
Taküm June 20 nü Urban Development ministry-i shidi ka ajanga Amitabh Bachchan dang Swachh Bharat Abhiyan campaign ajungkettsütsü atema pa ola den nübo agüjang ta asüngdanga liasü. Iba nungji jana intokba ajema akumtsü atema yimti nung janatem fertilizer ama amshitsü densema lir, ta ketdangser kati ashi.
Paisa, onoki Bachchan nungi telangzüba atadar, ta metetdaktsü.
Mission Director, Praveen Prakash-i züluba shidi nungji, bio-degradable jana agi compost küma fertiliser ama amshitsü aser jana intokba ajema akumtsü atema sorkari meranger, ta shia lir. Nüburtem dang iba osang sangdongtsü atema Bachchan nübo bushir, ta shidi nung shia lir.
“Swacch Bharat Mission nung densemba tongti rongnung- yimti/jila ajak shilem 100 scientific management lir. Sorkari bio-degradable jana compost süa fertilizers ama amshitsü jangrar. Ibaji takok angutsü atema iba mapatong ya aluyimertem, sensotem, nursery aser public atsüki nung inyakertem dang sangdongtsü nüngdaker,” ta shidi nung shia lir.
“Iba osang sangdongba ajanga iba mission ajungkettsü atema onoki promotional materials  amshitsü sentong lir. Iba ya ajungkettsütsü atema nai radio advertisements, TV commercials aser posters nung nü ola aser nübo agütsütsü melungra onoki pelatsü,” ta shidi nungsa shisema lir.
Ato kilonser, Narendra Modi-i Swachh Bharat Abhiyan (Clean India Mission) ya 2014 küm October 2 nü tenzükja liasü aser linük rangben merüktettsü atema küm pongu atemzüka ayu.