Swachh Bharat Abhiyan ya Revolution ka lir: Kher

Mumbai, October 4 (Agencies): Mahatma Gandhi sur küm 148buba nungtem nung Bollywood-i Rashtriya Swachhta Diwas ayongzüka amongba mapang nung actor Anupam Kher-i sorkar indang Swachh Bharat Abhiyan sentong nung aibelen dang putettsü merangertem aitsüogo aser pai iba sentong aitsüa dang makazüi iba nung shilem agitsü asoshi ayongzük.
Iba sentong nung Amitabh Bachchan aser Kailash Kher nungera densema liasü.
Ato Kilonser Narendra Modi-i ayongzükba mapa ya mapa küma inyaka odar asü maoer, ta asüngdangba nung Kher-i ashiba agi: “Nai iba amala campaign ka mapa küm aoer asü maoerar meshitettsü. Iba ya revolution ka ta ni amanger aser iba amala sentong ka atema mapang nüngdaker.
“Asenoki iba indang result tang linük nung ngua arudar, asenoki sentong tuluka atemzüker inyakdar aser Amitabh Bachchan nungeri dena iba amala jenjang nung shilem agiba ajanga ajak abensatsür.
“Anungji mabensaba tetuta sayua kazüba dang nungibo teyari agütsüba tajungba asütsü, ta nibo bilemer,” ta Kher-i ashi.
Swachh Bharat Abhiyan ya India mereka ayutsüba nükjidong nung Modi aniba sorkari 2014 October ita 2nü Mahatma Gandhi asoba anogo nüngtem nung tenzük, aser iba ya sorkar sentong tongtibang rongnung ka lir.
Maneni Kher-i tawa Juhu yimtong merekba nung tajangshiba lemsatepa liasü.
“Ni anogoshia mapai aodang lenmang nung dang dokan jakdang jana toktener aliba ngua liasü. Ni nisungtem aser dokan kiburtem den ibaji merektsü asoshi jembia liasü saka mapa küma inyaka mao.
“Anungji ni kü sasa merek. Merek mereka aliba tesem ka janatsütsü asoshi arendaka bilemer, ta Amitabh Bachchan-i ashiba nia agizüker. Ni ni meketa yard ter mereka ayur aser asenoki asen linük asoshi ibajibo inyaktsütsüla,” ta pai ashi.
Merekmejuba nung shilem tajung agiang aser tetsürtem atema metsümeshidak talisa jila tila nung yanglutsütsü asoshi tali temolung agüja inyakang, ta paisa ashi.