Swachh Bharat atema Telecom, Petrol nung saru agitsüla: NITI Aayog

New Delhi, September 23 (Agencies): Swachh Bharat atema Chief Ministers’ Sub-Group (NITI Aayog)-i merükmejuba mapatong atema senotsü lenmang asoshi telecom services, petrol aser nagmati ama ali nungi adokba rongsentem nung saru agitsüla, ta benokogo.
NITI Aayog ludenisa waste-to-energy aser compost project tem atema khen nung senotsü teyari agütsütsü, saru memeshitsü aser saru balaka asütsü benokogo.
“Taruba küm pongu nung ‘Swachh Bharat’ nükjidong ataloktsü asoshi India sorkari telecom services, petrol, diesel, iron ore aser nagmati ama ali nungi adokba rongsen nung saru agitsüla,” ta sub-group Convenor aser Andhra Pradesh Chief Minister N Chandrababu Naidu-i osangbenertem dang ashi.
Iba luden senden amenba sülen osangbenertem den jembidang Naidu-i, “Sub-group-i NITI Aayog dang luden-i benokbatem osangji taruba anogo 10 tsüngda renemang ta shiogo,” ta ashi.
Swachh Bharat mapatong atema senotsü khuretji Centre shilem 75 aser state shilem 25 asütsü aser tenem nung aliba state tem nungbo Centre shilem 90 aser state shilem 10 asütsü benokogo, ta paisa ashi.