‘Swachh Bharat’ kübok temerüktiba yimtiji Mysuru lir

New Delhi, February 15 (Agencies): India nung nisung million ka dak tema aliba yimtitem aser state yimtibatem rongnung Mysuru (Karnataka) yimti temerüktiba lir aser tamajungtibaji Jharkhand nung Dhanbad yimti lir.
2014 küm Swachh Bharat Mission tenzükba sülen tang mezüng temerüktiba yimtitem tarensen adokogo.
Temerüktiba yimtitem mezüngbuba tarensen 10 nung- Mysuru (Karnataka), Chandigarh, Tiruchiraplli (Tamil Nadu), New Delhi, Visakhapatnam (Andhra Pradesh), Surat (Gujarat), Rajkot (Gujarat), Gangtok (Sikkim), Pimpri Chinchwad (Maharashtra) aser Greater Mumbai (Maharashtra) lir.
Kasa tarensen nung tamajungtiba yimti 10 ji- Kalyan Dombivili, (Maharashtra), Varanasi (UP), Jamshedpur (Jharkhand), Ghaziabad (UP), Raipur (Chhattisgarh), Meerut (UP), Patna (Bihar), Itanagar (Arunachal Pradesh), Asansol (West Bengal) aser Dhanbad (Jharkhand) lir.
Item tarensen ya Swachh Bharat Mission-i lateta alibatem nung ajemdaker yanglua liasü. Item telatetbatem nung infrastructure, merükmeju indang service levels, merükmeju dak sendakba metsümeshitak, lokti indang metsümeshitak, jana bendenba, belenba aser entokba densema lir.
Tesütiba merükmejuba survey ya 2014 küm Swachh Bharat Mission metenzükdang agia liasü, aser iba survey ajanga nisung lakh ka dak tema aliba yimti 476 ayimjema liasü aser iba tarensen osangji 2015 küm agüka liasü. 2014 küm survey nung nütsüng lakh 1 nungi lakh 50 tashi aliba yimtitem liasü.
Iba dak sentakba nung Urban development ministry-i sangdong ka ajanga, iba survey ya teshimtet yimti kar nung merükmeju jenjang reprangdangtsü atema lir, iba den külemi yimtitem tsüngda merükmeju nung tajungyim agi tokteptsü atema lir, ta ashi.
2014 survey ajanga India nung North aser East tsütsü aliba yimtitem dang nungibo South aser West tsütsülen aliba yimtitem tajungba lir ta sayua liasü, ajisüaka tan agiba survey ajanga, North tsütsü aliba yimtitemi-a junga inyaktetba kuli sayur.