Swachh Bharat Mission kübok DMC nem gari aser osettsüset aika agütsü

Hombarnü Dimapur Municipal Council office nung Dimapur Deputy Commissioner, Kesonyu Yhome, DMC CEO Atokhe Aye aser tangartemi garitem sayatsüdang agiba noksa angur.

Dimapur, May 15 (TYO): Swachh Bharat Mission scheme kübok Dimapur Municipal Council (DMC) nem gari aser osettsüset aika agütsüogo.
Swachh Bharat Mission scheme ya October 2, 2014 nü India Prime Minister-i tenzüktsü.
Tanü Dimapur Deputy Commissioner, Kesonyu Yhome-i o jembidang, merükmejutsü atema osettsüset tapu balala amshiyonga sensotem tangatetba memelenshira amajok dang asütsü, ta ashi.
Alizüng tongtettsü atema sensotemi municipal council den yariteptsüla aser public-i shilem agitsüla ta Yhome-isa ashi.
Taoba DMC CEO, Atokhe Ayemi-i kanga dang bendanga agüja inyakba ajanga mapang tatsüka tsüngda DMC telongtet nung terenlok jenti bener aruogo aser iba asoshi pa nem tenüngsang agütsür, ta Deputy Commissioner-isa ashi.
Sentong nung DMC, CEO Atokhe Aye-ia, “osettsüset tapu balala bener aruba ajanga merükmejuba mapa nung tajangzük angutsü. DMC nung mapa inyakertem ajaki alizüng atongtsü atema meranga inyaktsü ayongzüker” ta ashi.
Dimapur nung merükmeju mapa inyaktsübaji DMC-i dangbo mekoktettsü, anungji puvlic-ia yariteptsüla, ta paisa mepishia metetdaktsü.
June 5 nü World Environment Day amungba den külemi DMC-i kiyong lemsar kilen shia nem dustbin agütsütsü. Kilen shiai dustbin anana (wet & dry waste) angutsü, ta Atokhe Aye-isa ashi.
DMC-i shisaliok rejutem ajak nem dustbin alemtsü aser jila aser colony tem kübok tongtipang tesemtem nung dustbin yutsütsü, ta paisa shisem.
June ita tanabuba hopta nungi DMC kübok aliba ward shia nung jana bendentsü atema mini dipper truck yoktsü, Atokhe-isa metetdaktsü.
Swachh Bharat Mission scheme kübok DMC nem dipper mini truck 12, Excavator 1, road roller 1 aser dustbin 250 agütsü.